Perezida wa Tanzaniya yemeje ko icyorezo cya Marburg cyageze muri iki gihugu

Ibi bitangajwe nyuma y’uko Tanzaniya imaze iminsi ivuguruje Ishami ry'Umuryango w'Abibumbye ryita ku Buzima, OMS, ryari ryaratangaje ko hari Marburg muri iki gihugu. 

Amakuru yatangajwe na OMS avuga ko Perezida wa Tanzaniya, Samia Suluhu Hassan, yemeje ko icyorezo cya Marburg cyagaragaye muri Tanzaniya, ubwo yaganiraga n'itangazamakuru mu nama n’Umuyobozi Mukuru w’Ishami ry’umuryango w’abibumbye wita ku buzima (OMS), Dr. Tedros Adhanom Ghebreyesus, mu murwa mukuru wa politiki, Dodoma ku itariki 20 Mutarama 2025.

Perezida Samia Suluhu Hassan yavuze ko ibizamini byakozwe, ku bitaro bya Kabaile Mobile Laboratory muri Kagera, byagaragaje ko hari umurwayi umwe wanduye virusi ya Marburg, abandi bantu 25 basuzumwe, ibizamini byabo byagaragaje ko batanduye, Perezida Hassan yatangaje ko hafashwe ingamba zo gukumira iki cyorezo mu buryo bwihuse.

Perezida Samia yasabye abaturage ba Tanzaniya n'isi yose kutagira impungenge, abizeza ko igihugu gifite ubushobozi bwo guhangana n’iki cyorezo kimwe n’ibindi byagiye bigaragara mbere. 

Yagize ati: "Twagiye twerekana ko dufite ubushobozi bwo gukumira ibyorezo nk’ibi, kandi twiyemeje gukora nk'uko twabigenje mu bihe byashize”.

OMS ikomeje gufatanya na leta ya Tanzaniya mu kongera imbaraga mu kugenzura no gukumira icyi cyorezo. Dr. Tedros yavuze ko OMS ifatanyije n'abafatanyabikorwa bayo, izakomeza gushyigikira Tanzaniya mu gukumira icyo cyorezo vuba bishoboka, kandi ko igambiriye kubaka ejo hazaza heza, n’buzima buzira umuze kuri buri wese. 

Dr. Tedros yagize ati, "Iki ni igihe cyo gukorera hamwe, kugira umuhate no kurinda ubuzima bw’abantu ba Tanzaniya ndetse n’abaturage bo mu karere muri rusange".

Marburg ikomeje gutera impungenge kubera uburyo ikwirakwira vuba, nk’uko Dr. Matshidiso Moeti, Umuyobozi w’Ibiro bya OMS muri Afurika abivuga, ikwirakwira ku buryo bwihuse cyane cyane iyo umuntu agize aho ahurira n’uwayanduye, yandurira ahanini mu matembabuzi y’umurwayi wayo. Ibimenyetso by’icyo cyorezo birimo: kubabara umutwe, ibicurane, gucibwamo, gucika intege mu mubiri, n’ibindi.

Dr. Matshidiso Moeti yavuze ko imbaraga zashyizwe muri gahunda yo gukurikirana no kwirinda iki cyorezo ku rwego rw’igihugu ndetse no ku rwego mpuzamahanga ari ingenzi mu gukumira ikwirakwira ryacyo, cyane cyane mu bihugu bikora ku mipaka ya Tanzaniya.

Muri Afurika, icyorezo cya Marburg cyagiye kigaragara mu bihugu bitandukanye birimo Angola, Repubulika Iharanira Demokarasi ya Congo, Ghana, Kenya, Equatorial Guinea, u Rwanda, Afurika y’Epfo, ndetse na Uganda.

Icyorezo cya Marburg cyagaragaye bwa mbere muri Tanzaniya mu kwezi kwa Werurwe 2023 mu Ntara ya Kagera, cyongeye kugaragara muri Mutarama 2025, ibi byateye impungenge zikomeye muri Tanzaniya no mu bihugu byo mu karere, kandi inzego zitandukanye z’igihugu ziyemeje kurwanya no gukumira ikwirakwira ry’iki cyorezo ibifashijwemo na OMS.

Tanzaniya yatangaje ko hagaragaye icyorezo cya marburg mu gihugu, nyuma y'iminsi mike iteye utwatsi ibyari byatangajwe na OMS, ikavuga ko nta marburg irangwa muri iki gihugu.