Dore impamvu ugomba kujya urya ibigori byokeje

Usanga bantu bakunda kurya ibigori ariko mu buryo butandukanye, haba ibitetse, ibyokeje, injugu, kunywa igikoma cyabyo, akawunga, ndetse hari n’amavuta yabyo. Hari abakunda ibigori bitetse kuruta ibyokeje, kubera ko batazi kubyotsa cyangwa se kuko bibagora kubona aho bakigura, kandi nyamara ibitetse nabo babyitekera mu rugo. Nyamara icyo ugomba kumenya ni uko ibigori byokeje burya ari byiza ku buzima bwawe.

Ibigori byokeje bifite inyungu zitandukanye, niyo mpamvu uyu munsi tugiye kurebera hamwe impamvu ugomba kongera ibigori byokeje ku mafunguro yawe nk’uko tubikesha cookhealthystafit.com.

Ibigori byokeje bifite intungamubiri nyinshi umubibri wawe ukeneye, bifasha kandi mu kwihutisha igogora bitewe no kuba bikungahaye kuri “fibre”, ndetse bikaba bigabanya n’ibyago byo kurwara impatwe (constipation).

Mu bigori byokeje harimo aside folike, ishobora gufasha mu kugabanya inkorora, ikindi ni uko  bikungahaye ku myunyu ngugu nka magnesium, fer, umuringa, na fosifore, bigira uruhare mu gukomera kw'amagufwa. Byongeye kandi, birimo antioxydants ishobora gutuma uruhu rwawe rurushaho kuba rwiza ndetse bikanafasha mu kongera ubudahangarwa bw'umubiri, aho bifasha kugabanya ibimenyetso by’ubusaza nko kurwaragurika.

Ibigori byokeje bifasha kandi kugabanya urugero rwa cholesterol, bigafasha mu kugenzura umuvuduko wamaraso bityo bikakugabanyiriza ibyago byo kurwara indwara z’umutima. Kubera ko ibigori byokeje bifite fibre nyinshi, bishobora no kugirira mu kugabanya ibiro, bityo bikaba byakurinda kurwara umubyibuho ukabije.

Ibigori byokeje kandi bigira ibyitwa “carbohydrates” aho ari isoko y’imbaraga umubiri wawe ukeneye bityo bikaba byagufasha mu kugabanya umunaniro.Guhekenya ibigori byokeje bishobora gufasha mu kuvana bagiteri mu menyo, bikanakurinda kwirinda indwara z’amenyo.

Byongeye kandi ibigori byokeje bikungahaye kuri vitamine B1, B9, C, hamwe n’imyunyu ngugu nka magnesium, potasiyumu, na antioxydants, bitanga imbaraga, byongera metabolisme, no gufasha mu kugira imikorere myiza y’umutima.

Ibigori ni isoko nziza ya vitamine B12, aside folike, na fer, bishobora kugabanya ibyago byo kubura amaraso, kunoza umusaruro w’uturemangingo tw'amaraso atukura, no gufasha kugabanya isukari mu maraso.Nyamara, ni ngombwa kurya ibigori byokeje mu rugero kandi ukazirikana ibintu byongeweho nk'amavuta menshi, urusenda cyangwa umunyu, bishobora kugira izindi ngaruka ku mubiri wawe.