Indirimbo Jay Polly yakoranye na Davido yarasubitswe burundu

Umushinga w’indirimbo ya Jay Polly na Davido wabaye nkaya mabati!  Mu ijoro ryo ku wa 03 Werurwe 2018 muri Parikingi ya Sitade Amahoro i Remera, Davido yataramiye abanyarwanda mu rugendo rw’ibitaramo yahaye izina “30 Billion Tour” rwo kuzenguruka Afurika.  

Ari ku rubyiniro yagaragaje Jay Polly nk’umuhanzi wo mu Rwanda aha icyubahiro amusaba kumusanga bakaririmbana indirimbo ye yise ‘Ku musenyi’.  Jay Polly yagaragaje imbaraga nyinshi ku rubyiniro afatanyije na Davido bazamura ibyishimo by’abafana.  

Bombi babwiye itangazamakuru ko batangiye urugendo rwo gukorana indirimbo. Kuya 05 Kanama 2018, Jay Polly yahamirije INYARWANDA, ko indirimbo bise 'Money' yakoranye na Davido amajwi yayo (Audio) yarangiye.

Yavugaga ko yaba we ndetse na Davido bamaze kuririmbamo igisigaye ari uko amashusho yayo atangira gukorwa. Kuya 24 Kanama 2018, Jay Polly yakatiwe gufungwa amezi atanu aryozwa gukubita no gukomeretsa umugore akamukura amenyo. 

Yafunguwe muri Mutarama 2019 abwira itangazamakuru ko yabaye mushya agiye kwiyitaho no gusubukura imishinga y’indirimbo afite. Yahise ashyirwa mu bitabo by’abahanzi bafitanye amasezerano n’inzu ireberera inyungu z’abahanzi ya The Mane yashinzwe na Bad Rama.

Mu kiganiro yagiranye na Radio Rwanda, kuri uyu wa Gatandatu tariki 25 Gicurasi 2019, Jay Polly yatangaje ko indirimbo ya mbere yari yakoranye na Davido yasubitswe burundu.  

Yavuze ko mu minsi ishize we na ‘management’ ye bagiranye ibiganiro na Davido abaha gahunda y’uko bakora indi ndirimbo mu Ukuboza 2020. Ngo Davido yamusabye ko amajwi y’iyi ndirimbo yazasohokera rimwe n’amashusho yayo. 

Jay Polly yatangaje ko mu Ukuboza 2020 we na Davido bazakorana indirimbo bemeranyije

Jay Polly na Davido bateganyaga ko indirimbo bakoranye igomba gusohoka mu 2018. Yavuze ko abantu badakwiye kwizera ibyo avuga ahubwo ‘Bizere Imana gusa kuko twebwe turapanga Imana igashyira mu bikorwa’.  

Yagize ati “Njyewe ntibanyizere bumve ko mfite igikorwa ngomba kurangiza kandi cyabo. Icyo nababwira n’uko mu kwa cumi na biri twarangije kubyemeza,”

Yakomeje avuga ko umushinga wa mbere w’indirimbo yakoranye na Davido, amajwi yayo yafashwe bari muri Radisson Blu Hotel bafashijwe na Pastor P.   

Ngo bahisemo gukora indi ndirimbo bitewe n’uko ‘abantu ni bashya dufite mu mutwe hashya umwaka ni mushya ibintu byose ni bashya reka dukore ikintu gishya gikubita kigashwanyaguza.’.

Amashusho y’iyi ndirimbo ngo agomba kuzafatirwa muri Nigeria. Mu Ukuboza 2020 Davido azaba ari mu bikorwa bitandukanye by’iserukiramuco ry’iwabo ari nabwo azaba afite umwanya munini ndetse ko anifuza ko Jay Polly azahura n’abandi bahanzi bo muri Nigeria.  

Jay Polly yahamije ko kuba indirimbo yakoranye na Davido itarasohotse atari uko yafunzwe cyangwa se atari afite abajyanama mu muziki ahubwo ko hari byinshi byabiteye.

Jay Polly amaze imyaka igera ku icumi mu muziki. Mu bihe bitandukanye yakoze indirimbo zakomeje izina rye.  

Agifungurwa yashyize hanze indirimbo ‘Umusaraba wa josua’ yaririmbyemo ‘Ndakomeye kurusha mbere’ yongeraho indi yise ‘Inshuti nyazo’.  

Ni umwe mu bahanzi bari mu gitabo cy’abegukanye irushanwa rya Primus Guma Guma Super Stars ryahagiritswe.  

David Adedeji Adeleke [Davido], ni umunya-Nigeria w’umuririmbyi, umwanditsi w’indirimbo.

Yavukiye i Atlanta akurira mu Mujyi wa Lagos. Amaze iminsi mu bitaramo bikomeye aritegura gutaramira Philadeliphia muri Leta zunze ubumwe za Amerika, kuya 31 Gicurasi 2019.