Mu bukwe bwe bamucurangiye indirimbo ya Kiyovu na Rayon! Urwibutso rwa Alain Muku mu mupira w’amaguru

Mu ijoro ryakeye ni bwo hatangiye gukwirakwizwa amakuru y’uko Alain Muku yaba yitabye Imana ariko nyuma gato abo mu muryango we batangariza InyaRwanda.com ko uyu mugabo wari inshuti ya bose atari yitaba Imana ahubwo ari muri coma.

Byakomeje guca igikuba mu bantu ari bwo mu gitondo cyo kuri uyu wa Gatanu umwe mu bagize umuryango wa Alain Muku yabwiye InyaRwanda.com ko uyu mugabo w’imyaka 55 yitabye Imana mu gitondo cyo kuri uyu wa Gatanu. Mu minota micye ishize, Guverinoma y'u Rwanda yemeje urupfu rwa Alain Mukuralinda.

Uretse kuba yari umuvugizi wungirije wa Guverinoma y’u Rwanda, Alain Muku yari yarihebeye umupira w’amaguru ndetse yanakoze ibikorwa byinshi bigamije kuwuteza imbere mu ngeri zitandukanye.

Alain Muku yashize irerero ry’umupira w’amaguru aryita ‘Tsinda batsinde’ mu rwego rwo gufasha abana bafite impano yo gukina umupira w’amaguru nk’uko mu mwaka wa 2022 yabitangarije InyaRwanda.com

Icyo gihe yagize ati “Ikintu cyatumye noneho tunatekereza kuba twakora kuriya [Gushinga academy] igihe nazengurukaga mu Rwanda twibereye mu bya muzika nabonye ko dufite abana bafite impano nyinshi, abahungu n’abakobwa, muri muzika zitandukanye, mu ndimi zitandukanye. Ndavuga nti byanze bikunze ubu no mu mupira niko bimeze kandi koko niko twabisanze.”

Icyo gihe yavuze ko ubwo yagarukaga mu Rwanda yasanze hari itegeko ririho rigenga ‘Académie’, araryisunga mu gushinga iyi kipe.

Uretse kuba yarashinze iri rerero ry’umupira w’amaguru mu rwego rwo kuzamura impano z’abakiri bato ndetse no guha amahirwe abafite impano, Alain Muku yifashishije ubuhanga bwe mu guhimba no kuririmba hanyuma ahimbira ikipe y’Igihugu indirimbo ‘Tsinda batsinde’ iri mu zamamaye cyane ndetse kuvuga ikipe y’igihugu ntuyicurange bigasa nk’aho hari ikibura.

Uretse no kuba ari ikipe y’Igihugu, Alain Muku yahimbiye indirimbo amakipe menshi atandukanye hano mu Rwanda ariyo APR FC, Rayon Sports, Kiyovu Sports ndetse na Mukura VS.

Tariki ya 23 Ugushyingo 2024 ubwo yari mu kiganiro Kick Off gitambuka kuri Televiziyo Rwanda, yavuze ko yakoze indirimbo ‘Tsinda batsinde’ ariko akaba atacyumva nk’aho ari iye ahubwo ari iy’Amavubi ndetse n’abato bumvaga ko ari iye, baratungurwaga.

Ati “Nkubwije ukuri iriya ndirimbo ntabwo ikiri iyanjye, yabaye iy’Amavubi, iy’Abanyarwanda, ni uko mbifata. Kuyumva ni byiza birashimisha kandi buriya nayikoze ari intego. Imyaka ibaye 20 isohotse abana b’ubu barayikunda ndetse n’iyo babonye ari njye wayikoze baratangara cyane.”

Yakomeje avuga ko iyi ndirimbo ubwo yasohokaga yanifashishijwe mu matora y’Umukuru w’Igihugu mu 2003. Ati “Mu matora ya mbere iriya ndirimbo yarakoze, abantu bataratangira gukora izijyanye n’amatora. Buriya nari nayise ishema ry’u Rwanda nyijyanye kuri Radio Rwanda izina bararihindura.”

Alain Muku yakomeje avuga ko kubera urukundo yakuze akunda umupira w’amaguru ndetse n’ikipe ya Kiyovu Sports, mu bukwe bwe bacuranze indirimbo ya Kiyovu Sports ndetse n’iya Rayon Sports bituma ubukwe bwe buba igitangaza kurushaho.

Ati “Mu bukwe bwanjye twageze hagati, uvanga imiziki ashyiramo iya Kiyovu kuko ari yo mfana maze harashya (harashyuha cyane). Yahise akurikizamo iya Rayon Sports ubundi harakonkoga, bariya bantu ntabwo umenya aho bavuye (Aba-Rayon) niyo waba uri muri Australia.”

Alain Mukuralinda yitabye Imana azize guhagarara k'umutima

Reba indirimbo Alain Mukuralinda yahimbiye Kiyovu Sports akaba ari nayo kipe yafanaga

">

Reba indirimbo Tsinda Batsinde yahimbiye Amavubi

">

Reba Indirimbo Alain Muku yahimbiye Rayon Sports

">