Perezida wa UEFA yanenze igitekerezo cya FIFA cyo kugira amakipe 48 mu gikombe cy’Isi cya 2030

Icyo gitekerezo ariko cyamaganiwe kure na Perezida wa UEFA, Aleksander Čeferin, wavuze ko “ari igitekerezo kibi ku mupira w’amaguru w’Isi yose.”

Ubwo yari mu nama y’inteko rusange ya UEFA yabereye i Belgrade ku wa Kane, Ceferin yatunguye benshi ubwo yamaganaga uwo mushinga watanzwe n’umuyobozi w’ishyirahamwe ry’umupira w’amaguru muri Uruguay, Ignacio Alonso, mu nama ya FIFA Council yabaye mu kwezi kwa Werurwe.

Čeferin yagize ati: "Ni ibintu byantunguye cyane. Nta nubwo twari tuzi ko hari igitekerezo nk’icyo kigeze kibaho. Ndumva atari igitekerezo cyiza na gato, haba ku gikombe cy’Isi ubwacyo cyangwa ku mikino yo gushaka itike. Sinzi aho cyavuye, ariko sinagishyigikiye na gato,"

Kugeza ubu, FIFA nk’urwego rw’umupira w’amaguru ku Isi, rwatangaje ko rugiye gusuzuma icyo cyifuzo cyo kongera amakipe, ariko ntabwo ruratangaza icyemezo cya nyuma.

Abayobozi nka Ceferin bavuga ko kongera amakipe bishobora kugabanya ireme ry’irushanwa, bikaba byanagora ibihugu byinshi kubona itike, kuko uko irushanwa ryaguka ari na ko gahunda yaryo irushaho kuba ndende kandi itwara amafaranga menshi.

Mu gihe Isi yitegura kwakira igikombe cy’Isi kinini kurusha ibindi byabayeho, hari impaka zikomeje ku cyerekezo FIFA yafata mu 2030. Perezida wa UEFA yamaze kugaragaza aho ahagaze, ariko igisubizo cya nyuma kizava muri FIFA, igomba kureba niba kongera amakipe ari ukwagura umupira w’amaguru cyangwa se ari ugutuma utsikira.

Perezida wa UEFA yanenze igitekerezo cyo kuzakinisha ibihugu 48 mu gikombe cy'Isi cya 2030