Kevin Kade agiye gukorera igitaramo cya mbere i Dubai

Si ubwa mbere, uyu musore ugezweho muri iki gihe binyuze mu ndirimbo ‘Sikosa’ yakoranye na The Ben na Element azaba akandagiye i Dubai, kuko yahagiye mu bihe bitandukanye mu bikorwa byari bigamije kuhafatira amashusho y’indirimbo ze.

Yatumiwe binyuze muri Sosiyete y’umuziki ‘Agakoni’ isanzwe ifasha abahanzi Nyarwanda gutaramira muri kiriya gihugu. Kevin Kade agiye kuhataramira abisikana n’umuraperi Young Grace wahataramiye ku wa Gatandatu tariki 21 Nzeri 2024.

Kevin Kade azataramira abafana be n’abakunzi be b’umuziki mu gitaramo cyiswe “Deira Party” kizaba ku wa 9 Ugushyingo 2024. Azahurira ku rubyiniro na Dj Mico, Dj Traxx, Zeek Demo, Dj Manasa ndetse na MC Robot.

Azaririmbira mu kabyiniro ka Matrix African Club ahasanzwe hataramira abahanzi bakomeye ku Isi. Batman wateguye iki gitaramo yabwiye InyaRwanda, ko batumiye Kevin Kade kubera ‘ubuhanga afite mu muziki no kuba abafana be hano i Dubai baramusabye cyane’.

Akomeza ati 'Impamvu natumiye Kevin Kade ni uko benshi bamusabye hano muri Dubai. Kandi gahunda yanjye ni ugushyigikira umuziki w'Abanyarwanda, n'ubwo nshyize imbere guteza imbere Hip Hop ariko icya mbere ni umuziki w'Abanyarwanda."

"Abantu benshi bansabye ko natumira Kevin Kade. Rero, icyo abantu bakitega ni uko ari igitaramo cy'amateka gifite icyo kizazamura ku ruhande rwa Kevin Kade ndetse no ku ruhande rwanjye nk'utegura ibitaramo."

Kevin Kade agiye kujya Dubai mu gihe aherutse kuririmba mu birori by’umubyinnyi Sherrie Silver byabereye muri Kigali Convention Center, aho ku rubyiniro yahuriyemo na The Ben na Element.

Muri uyu mwaka, uyu musore ashyize imbere gukorana n’abahanzi bakomeye. Ndetse, birashoboka ko mu gitaramo The Ben azakorera muri BK Arena tariki 1 Mutarama 2025, ari mu bahanzi bazataramana.

Kevin Kade yamenyekanye cyane binyuze mu ndirimbo zirimo nka 'Ma Bae', 'Ibirara' yakoranye na Uncle Austin, 'Wankaniye', 'Umuana', 'Munada'. 'Amayoga' yakoranye na Kozze n'izindi.

Kuva mu myaka itatu ishize, uyu muhanzi yagaragaje imbaraga zidasanzwe, ndetse ni umwe mu banyuze mu ishuri rya muzika rya Nyundo, kandi yakoranye by'igihe kirekire n'inzu ifasha abahanzi mu bya muzika ya Uncredible Records.

Kevin Kade agiye gutaramira ku nshuro ye ya mbere mu Mujyi wa Dubai

Kevin Kade yagiye ajya i Dubai mu bikorwa byari bigamije gufata amashusho y’indirimbo

Kevin Kade agiye kujya Dubai mu gihe yitegura gusohora indirimbo zirimo ‘Nyiragongo’ 

KANDA HANO UREBE AMASHUSHO Y’INDIRIMBO ‘SIKOSA’ YA KEVIN KADE, THE BEN NA ELEMENT

">