Manchester United yasinyishije myugariro Leny Yoro

Mu masaha asatira umugoroba kuri uyu wa Kane ni bwo Manchester United yatangaje ko yasinyishije myugariro ukomoka mu Bufaransa, Leny Yoro.

Manchester United yegukanye uyu mukinnyi ikubise inshuro andi makipe yifuzaga uyu myugariro harimo Real Madrid, Liverpool na Tottenham Hotspur.

Leny Yoro w'imyaka 18 y'amavuko, abaye umukinnyi wa kabiri Manchester United isinyishije kuva yagera mu biganza bya INEOS irangajwe imbere na Sir Jimm Ratcliffe. Umukinnyi wa mbere wasinyishijwe na INEOS, ni rutahizamu Jossua Zirkzee wavuye muri Bologna.

Amasezerano ya Leny Yoro, azarangira mu mpeshyi ya 2029, cyane ko yasinye imyaka itanu akinira Manchester United. Manchester United byayitwaye Miliyoni 50£, kugira ngo yegukane uyu mukinyi Leny Yoro.

Iyi kipe iherutse gutangaza ko ifite gahunda yo kubakira ku bakinnyi bakiri bato, bityo ikaba ariyo mpamvu iri gusinyisha abakinnyi bato. Leny Yoro yasanze abandi bakinnyi bato muri Manchester United nka Kobbie Mainoo, Garnacho n'abandi. 

Leny Yoro w'imyaka 18 y'amavuko yasinye amasezerano y'imyaka itanu muri Manchester United 

Leny Yoro afite ubushobozi bwo guhagarika abakinnyi bakomeye nka Kylian Mbappe