APR FC ihagaze ite mbere yo gukina na Mogadishu City?

Iyi kipe y’ingabo z’igihugu izakina na Mogadishu City mu mukino w’ijonjora ry’ibanze muri CAF Champions League, umukino ubanza ukazabera kuri Stade Gouled yo muri Djibouti kuri iki Cyumweru, mu gihe uwo kwishyura uzabera kuri Stade ya Kigali i Nyamirambo ku wa 19 Nzeri 2021.

APR FC yageze muri Djibouti ku wa Kane, ikomeje gukora imyitozo n’abakinnyi yajyanye bose, uretse Byiringiro Lague, Ruboneka Bosco, na Kwitonda Alain Bacca batazagaragara muri uyu mukino kubera ibibazo by’imvune.

Byiringiro Lague wavunikiye mu ikipe y’igihugu Amavubi ku mukino yakinaga na Kenya mu Cyumweru gishize ndetse akaba ari hanze y’ikipe amezi Atandatu. Uyu mukinnyi yakubiswe inkokora mu isura irangirika, azagaruka mu kibuga byibura muri Gashyantare cyangwa Werurwe 2022.

Ruboneka Jean Bosco ukina mu kibuga hagati yagize ikibazo cy’imvune izatuma amara ibyumweru bitatu hanze y’ikibuga.

Umutoza Adil Mohamed utazatoza uyu mukino kubera ikibazo cy’ibyangombwa, yavuze ko adatewe impungenge no kubura aba bakinnyi kuko ngo buri mukinnyi wa APR wese afite ubushobozi bwo gukina.

Yagize ati” Nibyo koko turabura abakinnyi batatu Lague, Bosco na Allain (Bacca) ariko icyo nababwira ni uko abakinnyi ba APR bose barashoboye buri umwe wese akora ikinyuranyo, abakinnyi bacu bose turabizeye”.

Ikipe izakomeza hagati ya APR FC na Mogadishu City Club izahura na Etoile du Sahel yo muri Tunisa mu ijonjora rya kabiri rizakinwa mu Ukwakira 2021.

AMWE MU MAFOTO Y'IMYITOZO APR FC YAKOREYE MURI DJIBOUTI:

Adil Mohamed Erradi usanzwe ari umutoza mukuru ntiyemerewe gutoza uyu mukino