Kevin De Bruyne, umwe mu bakinnyi bo hagati beza b’ibihe byose muri Manchester City, yatangaje ko igihe cye muri iyi kipe kigeze ku musozo nyuma y’imyaka 10 ayihesha ibyishimo n’ibikombe.
Uyu mukinnyi w’imyaka 33 ukomoka mu Bubiligi, yatangaje aya makuru ku kuri uyu wa Gatanu binyuze mu butumwa bwuje amarangamutima yanyujije ku mbuga nkoranyambaga aho yavuze ko umwaka w’imikino wa 2024/25 ari wo wa nyuma muri Manchester City.
Yagize ati “Aya ni amezi yanjye ya nyuma nk’umukinnyi wa Manchester City. Uyu mujyi, iyi kipe n’abafana bayo bampaye byose. Nari mfite inshingano zo kubishyura byose kandi twabikoze."
De Bruyne yageze muri Manchester City mu 2015 avuye muri Wolfsburg yo mu Budage. Kuva icyo gihe, yabaye umutima w’ikipe ya Pep Guardiola, agira uruhare rukomeye mu gutwara Ibikombe 6 bya Premier League.
Yegukanye kandi ibihembo bikomeye nk’umukinnyi w’umwaka muri Premier League (2019/20 na 2021/22), Playmaker of the Season (2017/18, 2019/20, 2022/23)
Kevin De Bruyne yamamaye nk’umukinnyi wicisha bugufi, uharanira itsinzi, kandi ufite ubushobozi bwo guhindura umukino mu kanya nk’ako guhumbya. Mu myaka 10, yabaye intwari ya Etihad Stadium, afasha City kuba imwe mu makipe yubashywe cyane ku Isi.
Mu butumwa bwe, yagize ati: “Manchester izahora ku mitima yange, ndetse no mu byangombwa by’inzira by’abana banjye. Ibi ni byo byari inzozi kandi iyi ni yo nkuru nziza y’ubuzima bwanjye.”
Nubwo atatangaje aho azerekeza, benshi mu bakurikiranira hafi ruhago bemeza ko ashobora gusanga andi makipe yo muri Arabie Saoudite cyangwa Major League Soccer muri Amerika, cyangwa se akerekeza muri Qatar cyangwa mu Bushinwa.
Eng
RSS 
TANGA IGITECYEREZO