Ikipe ya Manchester City aguye miswi na Inter Milan naho Paris Saint-Germain ibona intsinzi kuri Girona bigoranye mu mikino ya UEFA Champions League.
Iyi mikino ya UEFA Champions League yo ku munsi wa mbere yakinwe mu ijoro ryo ku wa Gatatu tariki ya 18 Nzeri 2024.
Umukino wari ukomeye ni uwo ikipe ya Manchester City yo mu Bwongereza yari yakiriyemo Inter Milan yo mu Butaliyani kuri Etihad Stadium. Aya makipe yombi yaherukaga guhurira n'ubundi ku mukino wa nyuma w'iri rushanwa mu 2023 rikaba ryaregukanwe na Manchester City.
Umukino watangiye ikipe ya Manchester City ihererekanya neza umupira ndetse ikarema uburyo nk'aho Jack Grealish yahaye umupira mwiza Erling Haaland ari mu rubuga rw'amahina gusa birangira Alessandro Bastoni atabaye.
Nubwo wabonaga Inter Milan irushwa na Manchester City mu buryo bwose haba mu guhererekanya umupira ndetse no gusatira, ariko nayo yanyuzagamo binyuze kuri rutahizamu wayo Marcus Thuram warekuraga amashoti ari inyuma y'urubuga rw'amahina.
Mbere y'uko igice cya mbere kirangira Ederson yatabaye Manchester City ku mupira wari uzamukanywe na Carlos Augusto arekura ishoti ariko birangira atabaye arikuramo.
Igice cya Kabiri kigitangira Manchester City yagize ibyago ivunikisha Kevin De Brune asimburwa na Ilkay Gundogan. Pep Guardiora yakoze n'izindi mpinduka mu kibuga akuramo Savinho ashyiramo Phil Foden ngo arebe ko yabona igitego gusa bikomeza kugorana.
Na Simone Inzaghi nawe yakoze impinduka mu kibuga aha umwanya abarimo Lautaro Martinez, Henrikh Mkhitaryan na Denzel Damfries.
Ku munota wa 85 Lautaro Martinez yagerageje amahirwe ku mupira mwiza yari ahawe na Nicolo Barella arekura ishoti gusa umunyezamu wa Manchester City aratabara ashyira umupira muri koroneri.
Uyu mukino waje kurangira amakipe yombi anganyije 0-0 .
Indi mikino yabaye ikipe ya FC Bologna yo mu Butaliyani yanganyije na Shakhtar Donetsk yo muri Ukraine 0-0 naho Sparta Prague yo muri Repubilika ya Czech itsinda FC Red Bull Salzburg yo muri Australia ibitego 3-0.
Celtic yo muri Scotland yanyagiye Slovan Bratislava yo muri Slovakia ibitego 5-1 ,Club Brugge yo mu Bubiligi yatsinzwe na Borussia Dortmund yo mu Budage ibitego 3-0 bya Gittens na Guirassy naho Paris Saint-Germain yo mu Bufaransa itsinda Girona yo muri Espagne igitego 1-0 cya Paulo Gazzaniga witsinze ku ishoti ryari rirekuwe na Nuno Mendes.
Iyi mikino ya UEFA Champions League irakomeza kuri uyu wa Kane aho Saa Kumi n'Ebyiri n'iminota 45 aho Feyenoord yo mu Buholandi yakira Bayer Leverkusen yo mu Budage naho FK Crvena Zvezda yo muri Serbia yakire Benfica yo muri Portugal.
Saa Tatu z'ijoro Atalanta yo mu Butaliyani irakira Arsenal yo mu Bwongereza, Atletico Madrid yo muri Espagne yakire RB Leipzig yo mu Budage, Brest yo mu Bufaransa yakire Sturm Graz yo muri Australia naho Monaco yo mu Bufaransa yakire FC Barcelona yo muri Espagne.
Manchester City yanganyije na Inter Milan 0-0
Borussia Dortmund yatsinze Club Brugge ibitego 3-0
Nuno Mendes yafashije Paris Saint-Germain kubona intsinzi
Eng
RSS 
TANGA IGITECYEREZO