Rwanda: Mu kwirinda Coronavirus imikino imwe n’imwe izajya iba nta bafana bari ku bibuga

Mu rwego rwo kwirinda ikwirakwira rya coronavirus, mu minsi mike ishize Minisiteri ya Siporo mu Rwanda yategetse ko amakipe y'u Rwanda n'abakinnyi b'Abanyarwanda bahagarika imikino yose mpuzamahanga bari kwitabira.

Iri tangazo ryasohowe n'iyi Minisiteri rivuga ko "Amarushanwa abera imbere mu gihugu azakomeza nk'uko ateganyijwe...ariko imwe mu mikino basanze ari ngombwa yakinwa imiryango ifunze".

Ntabwo Coronavirus iragera mu Rwanda, ariko ubu imaze kuvugwa mu gihugu cy’abaturanyi cya Congo Kinshasa aho ku wa Kabiri w'iki Cyumweru habonetse umuntu umwe wanduye iyi ndwara.

Bigaragara ko henshi mu mujyi wa Kigali hafashwe ingamba zikomeye mu kwirinda ikwirakwira rya coronavirus mu gihe yaba igeze mu Rwanda, cyane cyane abantu batozwa gukaraba intoki kenshi.

Minisiteri ya Siporo mu Rwanda mu itangazo ryayo yamenyesheje amashyirahamwe y'imikino ko hazagenzurwa amarushanwa mpuzamahanga yari kubera mu Rwanda byaba ngombwa amwe agahagarikwa cyangwa akimurirwa ikindi gihe.

Ikipe y'u Rwanda y'umupira w'amaguru ‘Amavubi’ tariki ya 23/03 ifite umukino na Cape Verde (Cap-Vert) muri icyo gihugu ndetse n'uwo kwishyura mu Rwanda tariki 31/03 mu gushaka tike ya CAN 2021.

Mu Rwanda kandi kuva tariki 25 y'uku kwezi ku Gisenyi hateganyijwe imikino mpuzamahanga ya Beach Volley mu bagore yo gushaka ticket y'imikino Olempike ya Tokyo.

Muri Beach Volley ikipe y'u Rwanda y'abagabo yo yari kwitabira imikino nk'iyi kuva tariki 23 muri Sierra Leone.

Ikipe y'u Rwanda y'umupira w'amaguru y'abakina imbere mu gihugu nayo biteganyijwe ko ijya mu mikino ya CHAN muri Cameroun kuva tariki 04 y'ukwezi gutaha kwa kane.

Aya marushanwa yose tu8maze kuvuga, hari impungenge zuko ashobora kutitabirwa kubera Coronavirus.

Minisiteri ya Siporo mu Rwanda yategetse ko ahantu hose habera imikino, ku muryango, mu rwambariro rw'abakinnyi n'aho barira hashyirwa uburyo bw'isuku.

Leta y'u Rwanda yasabye abaturage kugabanya umuco wo kuramukanya bahana ibiganza kuko biri mu bishobora gukwirakwiza iyi ndwara.

Iyi virus yandurira mu matembabuzi y'uyirwaye mu gihe akorora yegereye cyane abandi, no mu gihe yikora mu maso agakora no ku bandi.

Imikino itandukanye irimo n'umupira w'amaguru ishobora kuba mu muhezo mu minsi iri imbere

Mu rtwego rwo kwirinda ikwirakwizwa rya Coronavirus abafana bashobora kuzacibwa ku bibuga ku mikino imwe n'imwe