Bisengimana Justin yasinye amasezerano yo gutoza FC Bugesera

Nk'uko bigaragara kuri Twitter y'ikipe ya Bugesera FC, Bisengimana Justin yasinye imyaka ibiri muri Bugesera FC aho asimbuye Muhire Hassa wari umutoza w’agateganyo kuva igihe Seninga Innocent yasezereye muri iyi kipe yari abereye umutoza. 

Bisengimana Justin (Iburyo) na Gahigi Jean Claude (Ibumoso) Perezida wa FC Bugesera 

Bisengimana yabanye na Seninga Innocent muri Police FC aho baviriye rimwe bose buri umwe akajya muri gahunda zo gutoza ukwe.

Bisengimana Justin yageze muri Sunrise FC tariki ya 4 Nzeli 2018 nyuma yo kuva muri Police FC aho yari umutoza wungirije. Icyo gihe yasinyemo umwaka umwe w’imikino 2018-2019, gusa akaba yaravuye muri iyi kipe umwaka utarangiye kuko yasohotsemo tariki ya 3 Gicurasi 2019.

Bisengimana Justin yari umutoza wa Sunrise FC ayivamo shampiyona itarangiye

Bisengimana asanze Bugesera FC yarasaruye umwanya wa 12 muri shampiyona 2018-2019 n'amanota 35 ndetse ikaba yarageze muri 1/8 cy'igikombe cy'Amahoro 2019 aho bakuwemo n'Intare FA.

Bisengimana Justin kuri ubu ufite impamyabumenyi ya CAF Licence A, yageze muri Police FC mu  ntangiriro z’umwaka w’imikino 2016-2017 aho yari yungirije Seninga Innocent kugeza hagati muri 2018, yatoje amakipe nka Sorwathe FC (2009-2012), Etoile de l’Est (2012-2014) na Gicumbi FC (2014-2016) mbere yo kuza muri Police FC mu mwaka w’imikino 2016-2017 akahava mu 2018.