Ahabanza Imikino

HUYE: Imikino ya ANOCA Zone V 2019 yatangijwe ku mugaragaro, ibihugu byose byitabiriye-AMAFOTO

Yanditswe na: Mihigo Saddam
Taliki:2/04/2019 22:00 0

Ku gica munsi cy’uyu wa Kabiri tariki ya 2 Mata 2019 mu karere ka Huye ni bwo habaye umuhango mpuzamahanga wo gutangiza ku mugaragaro irushanwa ry’imikino y’abato babarizwa mu makomite olempike yo mu karere ka Gatanu nk’uko komite mpuzamahanga olempike ibigena.

Aya marushanwa azibanda imikino itanu (5) ariyo; Athletics, Basketball 3*3, Cycling, Taekwondo na Beach-Volleyball. Abakinnyi bose hamwe bazitabira iyi mikino biteganyijwe ko bazarenga 300. Imikino yose izabera mu Karere ka Huye mu ntara y’amajyepfo.

Igihugu cya Misiri cyerekana abakinnyi kizitabaza

Igihugu cya Tanzania cyerekana abakinnyi kizitabaza

Ibihugu 11 bibarizwa muri ANOCA Zone V birimo; Burundi, Erythrea, Misiri, Ethiopia, Kenya, Rwanda, Somalia, South Sudan, Tanzania, Sudan na Uganda. Ibi byiyongeraho u Bufaransa buzahatana muri Taekwondo.

Ibihugu byose uko ari 12 ndetse n’amakipe yavuye mu nkambi z’impuzi ziri mu Rwanda, biyerekanye mbere y'uko abayobozi mu nzego zitandukanye za siporo bagira impanuro batanga ku bitabiriye uyu muhango waberaga muri sitade mpuzamahanga ya Huye.

Mustapha Berraf perezida w’impuzamashyirahamwe olempike muri Afurika (ANOCA) wari witabiriye uyu muhango nk’umushyitsi mukuru, yavuze ko ari amateka akomeye ku Rwanda kuba rugiye kwakira irushanwa ryatekerejwe ku nshuro ya mbere kandi ko yizeye ko rizagenda neza.

Mustapha akomeza avuga abana bazaba bari muri iri rushanwa bazahavana amasomo akomeye yo kwiga uburyo siporo ihuza abantu ndetse by’umwihariro bakazamenya amateka yaranze u Rwanda mu gihe cya Jenoside yakorewe Abatutsi mu Rwanda muri Mata 1994 kuri ubu u Rwanda rukaba rwenda kwinjira mu Cyumweru cyo kwibuka abarenga miliyoni bazize Jenoside yakorewe abatutsi.

“Nishimiye ko u Rwanda ari igihugu kizakira iyi mikino kuko nk’abanyamuryango tuzabyungukiramo kuko abazitabira iyi mikino cyane abana bazaba bakina, bazahakura amasomo atandukanye mu buryo siporo yaba umusingi wo gusakaza amahoro ku isi. Nizera kandi ko abana bose baje mu Rwanda bavuye mu bihugu bizahatana bazahakura amasomo y’ibyo u Rwanda rwanyuzemo muri Mata 1994 kuri ubu bakaba bafite aho bageze mu nzego zose zirimo na siporo”. Berraf

Mustapha Beraf perezida wa ANOCA atanga ubutumwa bw'umunsi

William Blick perezida w’impuzamashyirahamwe ya komite olempike zo mu karere ka Gatanu (ANOCA Zone V Youth Games) yavuze ko nawe ubwe yishimiye ko u Rwanda ruzakira iyi mikino y’abato ku nshuro yayo ya mbere kandi ko yizera ko u Rwanda ruzaba urugero rwiza ku bindi bihugu icumi (10) bisigaye bizaba byifuza kwakira iyi mikino izajya iba buri myaka ibiri.

“U Rwanda ruzakira neza kuko turwizeyeho ubwo bushobozi kandi abana bacu bari muri aya marushanwa bazahakura amasomo y’amateka y’u Rwanda kuko hazabaho umwanya wo gusura inzibutso za Jenoside yakorewe Abatutsi mu Rwanda mu 1994. Nka ANOCA Zone V rero twizera ko kuba iyi mikino igiye kuba ku nshuro ya mbere bizafasha ibindi bihugu kwiga uko nabo bazakina mu myaka ibiri iri imbere”. William

William Blick perezida wa ANOCA Zone V Youth Games

Ambasaderi Munyabagisha Valens umuyobozi wa Komite Olempike y’u Rwanda nk’urwego rukuru rucunga imikino yose y’imbere mu gihugu nawe yahaye ikaze ibihugu byose bizaba biri muri iri rushanwa ry’amateka ndetse yizeza abayobozi b’abandi baherekeje amakipe y’ibihugu byabo ko irushanwa rizagenda neza muri rusange kandi ko u Rwanda rushimira abanyamuryango ba ANOCA na ANOCA Zone V bose bahaye u Rwanda icyizere cyo kwakira irushanwa nk’iri ku nshuro ya mbere.

Amb.Munyabagisha yavuze ko kandi amasomo azatangwa muri iyi mikino azaba yibanda cyane kuri gahunda yo kurwanya no kurandura ingengabitekerezo ya Jenoside ahanini bikabanza kwigishwa urubyiruko biciye mu mikino.

“Iyi mikino ya ANOCA Zone V Youth Games, ni imikino y’urubyiruko nk’uko amategeko y’irushanwa ateye. Iri rushanwa rizadufasha kurwanya, kwigisha abana bakiri bato kwanga no kurwanya ingenabitekerezo ya Jenoside ahubwo twimakaza umuco w’amahoro, ubworoherane n’ubusabane ni bwo tuzaba twubahiriza indangagaciro n’imbaraga za siporo”. Amb.Munyabagisha

Amb.Munyabagisha Valens perezida wa komite Olempike y'u Rwanda

John Ntigengwa umunyamabanga uhoraho muri Minisiteri ya siporo n’umuco (MINISPOC) wari uhagarariye minisitiri muri uyu muhango nawe ntabwo yagiye kure y’ibyo bagenzi be bagiye bagarukaho uretse ko yijeje Komite Olempike y’u Rwanda na ANOCA ko Minisiteri yishimira ko u Rwanda rwahawe kwakira iri rushanwa abona u Rwanda ruzungukiramo byinshi mu kwigisha urubyiruko kwimakaza umuco w’amahoro.

Ntigengwa John umunyamabanga uhoraho muri MINISPOC

Nyuma y’uyu muhango wo gutangiza ku mugaragaro imikino y’urubyiruko ya ANOCA Zone V, imikino nyirizina iratangira kuri uyu wa Gatatu tariki ya 3 Werurwe 2019 ku bibuga bitandukanye biri mu mujyi wa Huye.

Abakina umukino ngorora mubiri wo gusiganwa ku maguru (Athletics) bazakoresha sitade Huye. Abazakina Basketball y’abakinnyi batatu buri gihugu bazakoresha ibibuga bya GSO Butare, umukino wo gusiganwa ku magare bazakoresha imihanda y’umujyi wa Huye, Taekwondo bazakoresha inyubako za Gatagara High School mu gihe abakina Volleyball yo ku mucanga bazakoresha ibibuga bishya bya GSO Butare.