Nubwo Arsenal yasigaye inyuma mu rugamba rwo kwegukana igikombe cya Premier League, umutoza wayo Mikel Arteta yemeje ko batazakura amaso ku mahirwe yo kugitwara.
Iyi kipe yo mu mujyi wa Londres yatsinzwe na West Ham igitego 1-0 kuri Emirates Stadium, bituma isigwa na Liverpool amanota 11.
Nubwo gukuramo icyo kinyuranyo ari ingorabahizi, Arteta avuga ko
nta cyayihagarika mu guhanganira igikombe kugeza ku munota wa nyuma.
Abajijwe niba yemera ko igikombe
cyamucitse, Arteta yasubije adaciye ku ruhande: "Over my dead
body." Ibi bivuze ko atemera gutsindwa keretse ntakiriho. Yunzemo ati:
"Niba ntabyemeye, ndagenda njye
mu rugo."
Yakomeje ashimangira ko nubwo
icyizere cyagabanutse nyuma yo gutsindwa, Arsenal ikiri mu rugamba. Yagize ati:
"Mu minsi ine ishize, twari
dufite amahirwe yo kugabanya ikinyuranyo, bikaba bisa nk’aho turi hafi cyane.
Ubu birakomeye kurusha mbere, ariko kugira ngo utware Premier League ugomba
gukora ibidasanzwe."
Muri uyu mwaka w’imikino, Arsenal
yahabwaga amahirwe menshi yo guhanganira igikombe, ariko imvune zakomeje
kuyisubiza inyuma. Bukayo Saka, Kai Havertz na Gabriel Martinelli bose bararwaye,
bigira ingaruka ku busatirizi bw’iyi kipe.
Nubwo yatsinzwe na West Ham, Arsenal
yitwaye neza mu mezi atatu ashize. Arteta yavuze ko mu mikino 15 iheruka,
Arsenal yatsinzemo 10 inganya itanu, ikagira amanota angana na Liverpool n’itandukaniro ry’ibitego ringana.
Ati: "Twagiye twitwara neza cyane, ariko umunsi umwe mubi ushobora
guhindura ibintu byose. Twaratsinzwe, Liverpool iratsinda, biba bigoye kwakira
ibyo."
Arsenal izasura Liverpool kuri
Anfield tariki ya 10 Gicurasi. Arteta avuga ko nibatsinda uwo mukino bazongera
kugarura icyizere cyo kwegukana igikombe.
Eng
RSS 
TANGA IGITECYEREZO