Ibyo wamenya kuri Brady Gilmore wegukanye agace ka Kabiri ka Tour du Rwanda 2025

Brady Gilmore yavutse tariki ya 14 Mata 2001, avukira mu gace ka Kalgoorie muri Australia. Akiri muto yakinaga amarushanwa yo gusiganwa kuri za moto gusa nyuma biza kurangira yisanze akina umukino wo gusiganwa ku magare.

Atangira uyu mukino wo gusiganwa ku magare byari mu 2022 ahereye mu ikipe y'abato y'iwabo ya ARA-Skip Capital Cycling Team. 

Muri uyu mwaka yitabiriye isiganwa rya Oceania Road Cycling Championships ryabereye muri Queensland iwabo muri Australia maze yitwara neza dore ko ariwe waryegukanye mu batarangeje imyaka 23.

Mu mwaka wa 2023 Brady Gilmore yazamuwe mu ikipe nkuru ya ARA-Skip Capital Cycling Team nyuma y'uko yari amaze kwitwara neza mu bato. Muri uyu mwaka yongeye kwitabira Oceania Road Cycling Championships ubundi yegukana agace ko gusiganwa n'ibihe ku mukinnyi ku giti cye mu batarangeje imyaka 23.

Yabaye uwa kabiri kandi mu irushanwa ry'abataregeje imyaka 21 rya Australian Road Championship,aba uwa kabiri mu batarangeje imyaka 23 muri Oceania Road Cycling Championships.

Muri uyu mwaka wa 2023 kandi yanegukanye umwanya wa mbere mu batarangeje imyaka 23 muri iri siganwa rya Oceania Road Cycling Championships ribera muri Australia.

Usibye ibi yanitabiriye isiganwa rya Le Tour de Bretagne ribera mu Bufaransa yegukana agace karyo ka gatatu.

Mu kwezi kwa 8 muri uyu mwaka yaje kujya gufata kwimenyerereza muri Israel-Premier Tech aza kuvayo mu 2024, asubira muri ARA-Skip Capital Cycling Team y'iwabo.

Muri uyu mwaka yitabiriye isiganwa rya Grote Prijs Dr. Eugeen Roggeman ribera mu Bubiligi aba uwa kabiri aho yari akurikiye Umufaransa, Samuel Leroux.

Mu kwezi kwa 9 Brady Gilmore yerekeje mu ikipe y'abato ya Israel-Premier Tech ,mu ntangiriro z'uyu mwaka azamurwa mu nkuru ahita anitabira Tour du Rwanda ya 2025 none yegukanye agace ka Kabiri ka kayo kavaga mu mujyi wa Kigali kereka i Musanze ku ntera y'ibilometero 121 aho yakoresheje amasaha 3 n'amasegonda 39. 

Tour du Rwanda ya 2025 izakomeza ku munsi w'ejo kuwa Gatatu hakinwa agace ka Gatatu kazava i Musanze kerekeza i Rubavu ku ntera y'ibilometero 102.

Brady Gilmore wegukanye agace ka Kabiri ka Tour du Rwanda ya 2025