Papa Francis akomeje kuzahazwa n'uburwayi

Papa Francis, umuyobozi wa Kiliziya Gatolika ku isi, ari mu bitaro bya Gemelli i Roma nyuma yo kurwara pneumonia yombi, indwara ifata ibihaha byombi ikaba ifite ingaruka zikomeye ku buzima bw’umuntu, cyane cyane ku bageze mu zabukuru. 

Nk’uko byatangajwe na Vatican ku wa Kabiri, uburwayi bwe bwateye impungenge zikomeye, bituma gahunda yari afite zihagarikwa.

Pneumonia ni indwara y’ubwandu bwo mu bihaha itera umubabaro, inkorora, umuriro no kugorwa no guhumeka. Iyo ifashe ibihaha byombi, bita "pneumonia yombi," bikaba bishobora kugira ingaruka zikomeye cyane ku bantu bafite ubudahangarwa bw’umubiri buke, nk’abasaza. 

Iyi ndwara ishobora guterwa na virusi cyangwa bagiteri, ikaba inasaba kwitabwaho byihuse n’abaganga. Amakuru atangazwa na Vatican News agaragaza ko nubwo ubuzima bwa Papa Francis bugoye, ubuvuzi ari guhabwa bwatumye agenda agira ibimenyetso byoroheje, ariko inzobere mu buvuzi zisaba gukomeza kumwitaho cyane.

Kubera ubu burwayi, Vatican yahagaritse gahunda zose Papa Francis yari afite muri iki cyumweru, harimo misa ya buri cyumweru n’andi masengesho yari ateganyijwe. 

Ubuyobozi bwa Kiliziya bwatangaje ko inshingano zimwe zizasimburwa n’abandi bayobozi, mu gihe ubuzima bwa Papa bukomeje gukurikiranwa. 

Nubwo ari mu bitaro, biravugwa ko akomeje kwakira abashyitsi mu buryo bworoheje ndetse anagerageza gukomeza imirimo imwe n’imwe, ariko abaganga bakomeje kumugira inama yo kuruhuka.

Papa Francis amaze igihe afite ibibazo by’ubuzima bijyanye n’ubuhumekero. Mu buto bwe, yagize uburwayi bwatumye bamukuramo igice cy’igihaha cy’iburyo. 

Mu mwaka wa 2023, yigeze kujyanwa mu bitaro kubera pneumonia, ariko icyo gihe yabashije kugaruka mu mirimo ye nyuma yo gukira. 

Ibi bibazo by’ubuzima byagiye bituma agenda ahindura uburyo akora inshingano ze, nko kugabanya ingendo ndende no kwirinda gukora ibikorwa bimugora cyane.

Vatican irahamagarira abakirisitu ku isi yose gukomeza gusengera Papa Francis muri ibi bihe bikomeye, kugira ngo abashe gukira vuba no gusubira mu nshingano ze. Kiliziya Gatolika n’isi yose bakomeje gukurikiranira hafi uko ubuzima bwe bugenda burushaho kumera.

Umwanditsi: Kubwayo Jean de la Croix