Vinicius Junior yaguze ikipe muri Portugal

Ibinyamakuru bitandukanye birimo Daily Mail, byanditse ko iyi kipe yaguzwemo imigabane myinshi n'itsinda ry'abashoramari bakomoka muri Espagne na Brazil gusa rikaba riyobowe n'uyu mukinnyi.

Iri tsinda rirangajwe imbere na Vinicius ryaguze imigabane muri FC Alverca iri hagati ya 70 na 80 % riyiguze n'umugabo wari uyifitemo witwa Ricardo Vicintin.

Iyi kipe ibinyujije ku mbuga nkoranyambaga zayo nayo yabitangaje aho yagize iti "FC Alverca iratangaza ko Ricardo Vicintin yagurishije imigabane ye muri itsinda ry’abashoramari bo muri Espagne na Brazil."

Vinicius ni umwe mu bakinnyi bahembwa amafaranga menshi mu ikipe ya Real Madrid ariko usibye n'ibi abona n'andi mafaranga menshi akuramo hanze y'ikibuga nk'aho aheruka kugirana amasezerano n'uruganda rwa Nike yo kuzajya arwamamaza akaba azarangira mu 2028.

Yiyongereye ku bandi bakinnyi baguze amakipe bagikina barimo N’Golo Kante waguze ikipe ya Royal Excelsior Virton ikina muri shampiyona y'icyiciro cya Gatatu mu Bubiligi na Kylian Mbappe uheruka kugura imigabane muri Caen ikina shampiyona y'icyikiro cya kabiri mu Bufaransa.

Alverca FC yamaze kugurwa na Vinicius Junior iherereye mu gace ka Alverca muri Portugal kakaba kari mu bilometero 15 uvuye mu murwa mukuru i Lisbon.

Kugeza ubu iri ku mwanya wa Kabiri muri shampiyona y'icyiciro cya kabiri aho irushwa amanota abiri na Tondela iyoboye kandi ikipe izasoreza ku mwanya wa mbere izahita izamuka mu Cyiciro cya mbere.

Alverca FC yigeze gukinaho shampiyona y'icyiciro cya mbere mu mwaka w'imikino wa 2004-05 gusa iza guhura n'ibibazo by'ubukene iramanuka.

Vinicius Junior wamaze kugura ikipe