UEFA Champions League: Kylian Mbappé yahemukiye Manchester City, amateka mashya arandikwa

Ni mu mukino wakinwe kuri uyu Wa Gatatu Taliki ya 19 Gashyantare 2025 Saa yine z'ijoro kuri Santiago Bernabeu.

Umukino watangiye Manchester City yari ifite akazi ko gutsinda ibitego 2-0 kugira ngo ikomeza ariyo ihererekanya umupira neza. Ku munota wa 4 gusa Real Madrid yahise iyikosora ku mupira muremure Raul Asensio yarahaye Kylian Mbappé ahita awuzamura urenga Ederson uruhukira mu izamu.

Aho umutindi yanitse ntabwo riva ku munota wa 8 gusa myugariro wa Manchester City,John Stones yahise agira ikibazo cy'imvune ava mu kibuga asimburwa na Nathan Ake.

Ikipe ya Real Madrid yakomeje gusatira binyuze ku bakinnyi bayo barimo Vinicius Junior na Mbappé. Ku munota wa 33 rutahizamu w'ikipe y'igihugu y'u Bufaransa, Kylian Mbappé yatsinze igitego cya kabiri ku mupira mwiza yarahawe na Rodrigo acenga Jusko Gvardiol awushyira mu izamu.

Mu gice cya kabiri ikipe ya Manchester City yaje ikomeza kurushwa cyane mu bijyanye no guhererekanya umupira ndetse no mu kurema uburyo.

Ku munota wa 61 Real Madrid yatsinze igitego cya 3 ku mupira yarahawe na Federico Valverde. Ku munota wa 77 amakipe yombi yakoze impinduka mu kibuga aho Pep Guardiola yakuyemo Ilkay Gundogan hajyamo James MacAtee,akuramo Phil Foden hajyamo Mateo Kovacic naho Carlo Ancelotti akuramo Kylian Mbappé na Dani Ceballos hajyamo Eduardo Camavinga na Brahim Diaz.

Nyuma yuko Manchester City ikoze impinduka mu kibuga yatangiye kugerageza gukina neza gusa kubona uburyo bufatika imbere y'izamu bikaba aribyo biba ikibazo.

Mbere yuko umukino urangira Manchester City yabonye igitego kuri kufura yaritewe na Omar Marmoush umupira uragenda ukubita igiti cy'izamu uragaruka guhura na Nico Gonzalez ahita awushyira mu nshundura.

Umukino warangiye Real Madrid itsinze Manchester City ibitego 3-1 ihita iyesezerera ku ikinyuranyo cy'bitego 6-3 yerekeza muri 1/8 cya UEFA Champions League.

Mbappé watsinze ibitego 3 wenyine muri uyu mukino yahise yandika amateka masha yo kuba umukinnyi utsinze ibitego 3 ikipe itozwa na Pep Guardiola mu mikino yo gukuranwamo muri UEFA Champions League.

Indi mikino yakinwe Paris Saint-Germain yanyagiye Brest ibitego 7-0, Feyenoord itsinda Juventus ibitego 2-1 naho Borussia Dortmund inganya na Spotting CP.

Amakipe yerekeje muri 1/8 cya UEFA Champions League avuye mu mikino ya kamparamaka ni Borussia Dortmund,Real Madrid,Paris Saint-Germain,PSV Eindhoven, Feyenoord,Club Brugge,FC Bayern Munich na Benfica.

Kylian Mbappé wahemukiye Manchester City wenyine 

Kylian Mbappé watsinze ibitego 3 wenyine