Pep Guardiola yagaragaje ubwoba mbere yo gucakirana na Real Madrid

Guardiola w’imyaka 54, yavuze ko amahirwe bafite angana na 1%, ariko ashimangira ko bazakora ibishoboka byose ngo bagerageze gusezerera Real Madrid.

Manchester City yatsindiwe mu rugo na Real Madrid ku bitego 3-2 mu mukino ubanza, nubwo bari babanje kuyobora n'ibitego 2-1 habura iminota 4 ngo umukino urangire.

Guardiola yavuze ko guhindura ibintu kuri Bernabeu bigoye cyane, ati: “Amahirwe yo gutsindira kuri Bernabeu duhagaze kuri uriya mwanya, buri wese arabizi, ni make cyane. Twavuga ko ari 1% cyangwa se ntazi neza, ariko ni make cyane.”

“Ariko igihe cyose hakiri amahirwe tuzagerageza, ibyo ni ko bimeze. Tuzajyayo uko twajyagayo kose, ariko muri uyu mwaka, ukuri ni uko twitwaye nabi cyane mu mikino no mu musaruro.”

Manchester City yarushije Real Madrid mu mukino ubanza ariko ntiyabasha kuwutsinda, ibintu byatumye Guardiola agaragaza impungenge ku buryo ikipe ye yitwaye muri uyu mwaka.

Yagize ati: “Uyu mwaka, ntitwitwaye neza mu mikino itandukanye. Twatakaje amanota menshi mu buryo budasobanutse kandi ibyo bishobora kutugiraho ingaruka muri Champions League.”

Nubwo Manchester City ifite urugamba rukomeye i Madrid, barajyana akanyamuneza nyuma yo gutsinda Newcastle ibitego 4-0 muri Premier League, bikaba byarabahaye icyizere cyo kwitwara neza muri Champions League.

Guardiola ati: “Byibuze nyuma yo gutsinda umukino wo ku wa Gatandatu, turajyana akanyamuneza i Madrid, nubwo bitahindura ukuri k’uko twitwaye muri uyu mwaka. Gusa byaradufashije mu mutwe no mu mitegurire y’umukino ukurikira.”

Manchester City irasabwa gutsinda Real Madrid ku kibuga cyayo kugira ngo ibashe kugera muri 1/8 muri Champions League, ikintu kitakunze gushobokera amakipe menshi mu mateka y’iri rushanwa, gusezerera Real Madrid.

Umutoza wa Man City yemeje ko bigoranye kuzasezerera Real Madrid muri UEFA Champions League