Neymar Jr arishimye cyane

Uyu mukinnyi w’imyaka 33, nyuma yo gusinya amasezerano y’igihe gito muri Santos, yagaragaje ko ari mu nzira yo kongera kwigarurira ubushobozi bwe bwo kwitwara neza mu kibuga.

Mu rucyerera, Neymar yatsinze igitego cye cya mbere mu mezi 16 ubwo yatsindiraga penaliti mu mukino batsinzemo Agua Santa ibitego 3-1.

Nyuma y’umukino yagize ati “Nishimiye kongera gukina. Numva ntangiye gutera imbere".

Uyu mukinnyi yahisemo gusubira muri Santos nyuma yo gutandukana na Al-Hilal yo muri Saudi Arabiya ku bwumvikane, nyuma y’imvune zatumye atitwara neza muri iyo kipe.

Yongeyeho ati: “Birumvikana ko ntari ku rwego rwiza 100% kuko uyu ari umukino wanjye wa kane kuva nagaruka, ariko buri munsi ndushaho kumva meze neza. Nari mfite amatsiko yo gutsinda igitego ngo ngiture abafana banjye n’umuryango wanjye.”

Neymar yatangiye gukinira Santos mu mwaka wa 2009 afite imyaka 17, atsinda ibitego 136 anatanga imipira yavuyemo ibitego 64 mu mikino 225 yakiniye iyi kipe mu gihe cya mbere.

Nyuma yo kwigaragaza nk’umukinnyi w’igitangaza, yerekeje muri FC Barcelona mu 2013, aguzwe miliyoni £48.6, aho yatwaranye nayo ibikombe 8 birimo Champions League na La Liga ebyiri.

Mu 2017, Neymar yerekeje muri Paris St-Germain mu masezerano akomeye ku Isi yose yo kugurwa akayabo ka miliyoni £200, aba umukinnyi uguzwe amafaranga menshi mu mateka y’umupira w’amaguru.

Yegukanye ibikombe 13 muri PSG, ariko nyuma aza kutumvikana n’umutoza Luis Enrique, ahitamo kwerekeza muri Al-Hilal muri Saudi Arabiya.

Neymar Juniour mu byishimo bikomeye cyane nyuma yo kongera gutsinda igitego