Ahabanza Imyidagaduro

I_Cyogere yahishuye icyamushoboje gukorana indirimbo na Nick Dimpoz n’ingamba yinjiranye mu 2025 – VIDEO

Yanditswe na: Brenda MIZERO
Taliki:26/01/2025 21:48 0

Mu Rwanda abahanzi bavuka umunsi ku wundi ndetse iyo uraranganyije amaso mu ndirimbo zisohoka buri Cyumweru, inyishi ziba ari iz’abahanzi bashya, kandi hafi ya zose ukumva zifite icyanga.

Ibi, bigendana n’uko ubuzima busa nk’ubworoshye ugereranyije na kera cyane ko umuhanzi atagipfa gupfukiranwa iyo afite impano igaragarira buri wese. Aha, turaza kwinjira mu mpano ya I_Cyogere, umusore wiyemeje kumenyekanisha u Rwanda mu mahanga biciye mu muziki.

Mu buzima busanzwe, yitwa Aimable Twagirayezu, ni Umunyarwanda ufatanya n'abandi guteza imbere igihugu, umugabane wa Afrika n'Isi muri rusange mu buryo butandukanye.

Mu gisata cy'umuziki, avuga ko yahisemo gukoresha I_Cyogere, “izina nkunda risobanuye "icyo Imana ishaka ko nkora mu gihe ndiho,’ Cyogere (kimenyekane), ikindimo cyangwa impano indimo njyewe gisakare/isakare kandi igihugu na cyo Cyogere, kimenyekane kurushaho mu ruhando mpuzamahanga.”

Akomoza ku rugendo rwe mu muziki, I_Cyogere yabwiye InyaRwanda ko gukunda umuziki yabitangiye yiga mu yisumbuye aho we n’inshuti ze bakundaga kubyina no gutegura ibitaramo, hanyuma akaza kubyinjiramo nk’umwuga mu 2023 ndetse akaba akataje muri uru rugendo.

Ati: “Urugendo rwanjye mu muziki si rurerure cyane, ariko si na rugufi cyane. Ubundi, byatangiye niga mu mashuri yisumbuye, Kabgayi mu Ntara y'Amajyepfo, aho nisanze nkunda umuziki n'incuti zanjye. Icyo gihe twakundaga kubyina no gutegura ibitaramo mu kigo no hanze yacyo. Kuva icyo gihe, nkomeza kugenda nkunda umuziki ariko byari ugusubiramo indirimbo z'abandi no kubyina gusa.

Muri za 2011-2013, ni bwo natangiye kwinjira muri studio ariko ntabwo indirimbo zakozwe zari nziza ku buryo zasohotse. Byari bimeze nko kwishyushya.

Ninjiye byeruye mu muziki muri 2023 nkora ‘Turaanda,’ 2024 nkora ‘Jah,’ na ‘Tudanse’ nasohoye vuba aha. Navuga ko kubera imbogamizi zitandukanye, ntigeze nshyira hanze ibihangano byinshi kugeza ubu, ariko ndashaka gukora cyane.”

Uyu munsi, uyu muhanzi yashyize hanze indirimbo yise ‘Tudanse’ yakoranye na Nick Dimpoz ndetse na Elisha the Gift, ni indirimbo avuga ko yashibutse muri we ndetse ikaba igaruka ku buzima bw’ibibaho mu buzima busanzwe.

Asobanura urugendo rwamugejeje ku gukorana na Nick, I_Cyogere yagize ati: “Nabonaga Nick akina filime, abyina n'ibindi nkakunda umuhate nabonaga afite. Ubwo najyaga muri studio, Elisha the Gift (na we waririmbyemo), twaraganiriye, nsanga aziranye na Nick. Musaba niba yaduhuza tugakorana kuri iyi ‘project’. Nyuma yaho, byarakunze turahura, duhurira studio dutangira gukorana indirimbo kugeza irangiye, mbere y'uko dufata amashusho.”

Yasobanuye ko iyi ndirimbo igaragaramo n'umunyarwenya Makanika, yayikoze mu rwego rwo kwibutsa abantu ko bagomba kwishima n'ubwo hari byinshi bacamo bikabababaza, bikabaca intege, ariko kandi ko ubuzima ari bugufi nta mpamvu yo guheranwa n'ibibi bibaho mu buzima.

Ati: “Muri iyi minsi, yego abenshi bakubwira ko imibereho igoye, ibibazo byinshi muri sosiyete n'izindi mbogamizi z'ubuzima, ntabwo twabirenza ingohe, ariko tugomba gufata umwanya wo kubyirengagiza, tukabyina, tukishima...Ikindi, Imana ntabwo ikoza isoni abayizera n'abayiringira. Izo mbogamizi, iyo uzeretse Imana, mu gihe cyayo itanga ibisubizo ubuzima bugakomeza.”

Uyu muhanzi yatangaje ko kuva yatangira umuziki kugeza ubu, yungutse abantu bashya, yiyunguye ubumenyi bushya ndetse akabasha no kubona uko agaragaza ibitekerezo bimurimo. Yakomeje avuga ko yifuza kugera kure hashoboka, gukora ibihangano byinshi kandi byiza, gukorana n'abandi bamurusha ubunararibonye haba mu Rwanda no hanze yarwo, n’ibindi Imana izamushoboza.

By’umwihariko muri uyu mwaka wa 2025 no mu gihe kiri imbere, I_Cyogere afite ingamba zo gukorana n’abandi bahanzi bubatse amazina akomeye, kwitabira ibitaramo, kumenyekanisha u Rwanda mu mahanga binyuze mu buhanzi, gukora EP imwe cyangwa ebyiri bitewe n’uko amikoro azagenda aboneka n’ibindi.

Yasoje asaba Abanyarwanda n’abakunda umuziki w’u Rwanda by’umwihariko, bamushyigikira bareba ibihangano bye ari nako babisangiza abandi, bamugira inama zamufasha gukora ibyiza kurushaho, aboneraho no gushimira abamufashije mu gutuma indirimbo ye nshya ‘Tudanse’ iva mu bitekerezo bye ikagera ku Banyarwanda kandi imeze neza.

Ati: “Dukeneye inama zatuma tunoza neza akazi kacu, ndi uwanyu, ndi umwana w'igihugu, kandi ndumvira tugamije guhesha ishema u Rwanda rwacu rwiza. Nibadushyigikire, ni umusanzu ukomeye ku muhanzi natwe inganzo irahari kandi mushonje muhishiwe. Reka nsoze nshimira Imana yatumye uyu mushinga ukunda (Tudanse), nshimire abantu bose bamfashije, Imana ibahe umugisha. Abakomeza kudufasha namwe Imana ibahe umugisha.”