Gen.Mubarakh Muganga yasabye abakinnyi ba APR FC kureka gutsinda igitego kimwe

Ku munsi ku Cyumweru tariki ya 24 Ugushingo 2025, nibwo uyu muyobozi w'icyubahiro yahuye n’abakozi b'iyi kipe mu rwego rwo kongera kubibutsa intego ndetse n'imyitwarire isanzwe iranga umukozi wa APR F.C

Gen. Mubarakh Muganga yababwiye ko APR FC ari ikipe y'Ingabo z'igihugu irangwa n'intsinzi ndetse ababwira ko gutsinda igitego kimwe nta mutekano kiba gifite bityo ko basabwa gutsinda byinshi.

Yagize ati" APR F.C ni ikipe y’Ingabo z’igihugu niyo mpamvu yitwa Armée Patriotique Rwandaise. Iyi kipe ifite uko yabayeho ,ni ikipe irangwa n'intsinzi aho ariho hose, nta kunganya, nta gutsindwa twe tubara intsinzi.

No gutsinda igitego kimwe burya nta mutekano wacyo uba ufite kuko isaha n'isaha bakwishyura, murasabwa gutsinda byinshi rero".

Yakomeje abwira abakinnyi ko bakina bahererekanya neza ariko bagera imbere y'izamu gutsinda bikanga bityo ko bafite umukoro wo kubikosora kandi ko babifitiye ubushobozi dore ko babongereyemo abakinnyi bashya.

Yagize ati " Ku mukino mwakinnye na Muhazi United nawukurikiye hafi iminota mirongo 70 yose, murakina mugahererekanya, ni byiza ariko muragera imbere y’izamu sinzi uko bihita bibagendekera, umupira ntabwo birangirira mu guherekanya. 

Oya ni intsinzi mufite umukoro ku mikino ikurikira yo kwerekana ko mwakosoye ibyo byose tutishimiye kandi mubifitiye ubushobozi kuko twabongereyemo amaraso mashya, mbere mwakinaga muri Abanyarwanda gusa tugeraho tubongereramo bagenzi banyu muri kumwe.

Ubu buri wese arahembwa,abona uduhimbazamusyi, ntacyo kwitwaza gihari mwerekane ko APR ari ya yindi ihorana intsinzi kuko nibyo byaturanze kuva na kera" .

Yababwiye kandi ko abakunzi ba APR FC bajya ku kibuga bashaka ibyishimo ariko bakaba batari kubibaha uko bikwiriye.

Yagize ati" Abakunzi ba APR FC baza ku kibuga bashaka ibyishimo ariko nti muri kubibaha uko bikwiriye. 

 Abafana nimwe mukwiriye gutuma baza ku kibuga kuko nimwe mubaha ibyo byishimo. Ubutumwa bw'ibyo babifuzaho murabyumva neza ko ari intsinzi mubyerekane kuri uyu wa Gatatu muhura na Bugesera".

Kugeza ubu ikipe ya APR FC iri ku mwanya wa 10 n'amanota 11, ikaba izasubira mu kibuga ikina na Bugesera FC ku wa Gatatu mu mukino wo ku munsi wa Kabiri w'ikirarane kuri Kigali Pelé Stadium Saa Kumi n'Ebyiri.

Umutoza wa APR FC,Darko Novic yumva ibyo Gen Mubarakh Muganga avuga 

Brig Gen Deo Rusanganwa Chairman wa APR FC nawe yari muri iyi nama