Imbamutima za Habimana Yves wa Rutsiro FC umaze gutsinda ibitego byinshi

Ku mugoroba wo kuri iki Cyumweru Tariki 24 Ugushyingo 2024, shampiyona y’u Rwanda, Rwamda Premier League yakomezaga ku munsi wa 10 wa shampiyona, ikipe ya Mukura ntabwo byayigendekeye neza kuko yatsinzwe ibitego bitatu ku busa, itsindwa na Rutsiro FC.

Ibitego bitatu byose bya Rutsiro FC byatsinzwe na rutahizamu Yves Habimana, akaba yahise aba umukinnyi ufite ibitego byinshi muri shampiyona y’u Rwanda , aho amaze kugira ibitego bitanu, akaba abirusha Fall Ngagne wa Rayon Sports ufite ibitego bine.

Nyuma yo gutsinda ibitego bitatu mu mukino wa Mukura VS, Yves Habimana yashimangiye ko amahirwe yo gusoza shampiyona ariwe ufite ibitego byinsi ari mu biganza bye, ndetse akaba abona azabigeraho ku bufatanye bwa bagenzi be bakinana muri Rutsiro FC, akaba kandi afite inzozi zo kuzahamagarwa mu ikipe y’igihugu.

Habimana Yves yagize ati: “ Tukigera mu mukino nabonye ubwugarizi bwabo bwose mbuzi, kandi nzi neza ko ari bantu basanzwe. Nahise mbona byanze bikunze nza kubatsinda ibitego, kandi niko byagenze, icya mbere cyagiyemo, icya kabiri kijyamo, n’icya gatatu kujyamo.

Intego mfite ubu ngubu ni ukuguma gukora cyane kuko mfite amahirwe yo gusoza mfite ibitego byinshi, ngomba gukora cyane kuko dufite ikipe nziza, kandi ngomba no gukora cyane ngo mbe nanabona amahirwe yo guhamagarwa mu ikipe y’igihugu ya CHAN.

Ikipe tugomba gukurikizaho ni Kiyovu kandi igomba kuza izi ko ibintu bikomeye. Twe turi ikipe ikomeye, turi ikipe idahangarwa, dufite abakinnyi beza,abatoza beza.

Ikintu nabwira Kiyovu ni uko ariya manota atatu ari ayacu kandi nabo barabizi, ni ukuza baje kwikinira gusa, kandi nzaba meze nabi kuko gahunda ni ugukomeza gukora cyane nkaguma kongera ibitego byange''.

Ibitego bitatu Yves Habimana yatsinze ikipe ya Mukura VS, byatumye ikipe ya Rutsiro iguma kuza imbere y’amakipe akomeye ku rutonde rwa shampiyona aho ari iya munani n’amanota 12. Umukino uzakurikiraho, Rutsiro FC izakira Kiyovu Sports i Rubavu.

Yves Habimana yatsinze ibitego bitatu ingunga ubwo Rutsiro yihanangirizaga ikipe ya Mukura VS