AS Kigali yatsindiye Amagaju i Huye naho Mukura VS ihanirwa i Rubavu

Ni mu mikino yakinwe kuri iki Cyumweru tariki ya 24 Ugushingo 2024 Saa Cyenda.Kuri Stade mpuzamahanga ya Huye ikipe y'Amagaju FC yari yakiriye AS Kigali.

Uyu mukino watangiye Amagaju FC ihererekanya neza ndetse ku munota wa 4 yashoboraga kuba yabonye igitego ku makosa yari akozwe na bamyugariro ba AS Kigali Oseni Kiza Seraphim abona umupira ari wenyine aho yari asigaranye na Cyuzuzo Aime Gael arekuye ishoti rinyura hejuru y'izamu kure.

Ku munota wa 18 ikipe ya AS Kigali yarase igitego cyabazwe ku mupira mwiza waruzamuwe na Nkubana Marc uragenda usanga Shaban Hussein ariwenyine mu rubuga rw'amahina gusa arekuye ishoti rikubita igiti cy'izamu urarenga.

Umukino wakomeje ikipe y'Amagaju FC ikomeza kubona uburyo bwinshi imbere y'izamu ariko kububyaza umusaruro bikaba ikibazo. 

Ku munota wa 42 AS Kigali yabonye kufura nziza ku ikosa Masudi Narcise yari akoreye Tchabalala amutereka hasi agiye kwinjira mu rubuga rw'amahina, iterwa neza na Dusingizimana Gilbert ayishyira mu nshundura, igitego cya mbere kiba kirabonetse ku ikipe y'Abanyamujyi.

Igice cya mbere cyarangiye ikipe ya AS Kigali itsinze igitego.

Igice cya kabiri cyatangiye ikipe ya AS Kigali ikora impinduka havamo Benedata Janvier na Gyslain hajyamo Ndayishimiye Didier na Iyabivuze Osee.

Ku munota wa 55 AS Kigali yabonye igitego cya 2 ku mupira waruvuye muri koroneri Tchabalala ashyiraho umutwe maze Tuyishime Emmanuel aritsinda.

Ku munota wa 67 Amagaju FC yatsinze igitego cyayo cya mbere ku mupira wari uhinduwe na Masudi Narcisse maze myugariro wa AS Kigali,Rucogoza Elias aritsinda.

Mbere y'uko umukino urangira Ntirushwa Aime yarekuye ishoti riremereye ryashoboraga kuvamo igitego ariko ku bw'amahirwe make rikubita igiti cy'izamu rivamo.

Umukino warangiye AS Kigali itsinze Amagaju FC ibitego 2-1. 

Undi mukino wakinwaga ni uwo ikipe ya Mukura VS yatsindwagamo na Rutsiro FC ibitego 3-0. Ni ibitego byose byatsinzwe na Habimana Yves.

AS Kigali yatsinze Amagaju FC ibitego 2-1