Zayn Malik yunamiye Liam payne mu buryo bwihariye

Kuri uyu wa 23 Ugushyingo 2024, nibwo Zayn yasubukuye ibitaramo bye bizenguruka imijyi itandukanye, yari yasubitse biturutse ku rupfu rw’uwo babanye mu itsinda rya One Direction.

Mu kubisubukura, igitaramo cye cya mbere yagikoreye mu mujyi wa Leeds mu Bwongereza, kuri uyu wa Gatandatu tariki 23 Ugushyingo 2024. Muri iki gitaramo kandi, niho Zayn yunamiye ndetse aha icyubahiro Liam Payne.

Yifashishije insakazamashusho yari aho yakoreye iki gitaramo, yandikishijemo inyandiko igizwe n’amazina (Liam Payne), umwaka yavutsemo n’uwo yitabyemo Imana (1993-2024), arenzaho amagambo agira ati “Ndagukunda muvandimwe”.

Mu gihe ibyo byabaga, insakazamashusho yari iri kwaka mu ibara ry’ubururu, birehekejwe n’indirimbo ya Zayn yitwa Stardust.

Ibi byazamuye amarangamutima y’abitabiriye iki gitaramo, bamwe binabaviramo gusuka amarira.

Ibi kandi byaje byiyongera ku butumwa burebure Zayn yashyize kuri instagram ku wa 17 Ugushyingo 2024, nyuma y’umunsi umwe Liam yitabye Imana, aho Zayn yamushimiye ku byo yamukoreye, agasoza agira ati “Ndagukunda muvandimwe”

Liam payne yitabye Imana aguye muri hoteli iherereye mu mujyi wa Buenos Aires muri Argentine ku wa 16 Ukwakira 2024 ubwo yikubitaga hasi ahubutse kuri etage ya gatatu y'iyi hoteli.

Uyu muhanzi Zayn uherutse gushimira Liam Payne avuga ko ubwo umuryango we wari ukiri mpunzi mu Bwongereza utarabona aho kuba afite imyaka 15 ko Liam yabafashije akabacumbikira iwabo.

Ni mu gihe kandi ku wa Gatatu w'iki cyumweru Zayn Malik na bagenzi be bo muri 'One Direction' bongeye guhura nyuma y'imyaka 8 yari ishize bagahurira mu muhango wo gushyingura Liam Payne, aho bitabiriye bose bambaye ibara rimwe.

Zayn Malik azakomereza ibitaramo mu mijyi irimo: Wolverhampton na London yo mu Bwongereza ndetse na Los Angeles, Las Vegas na New York yo muri Leta Zunze Ubumwe za Amerika.

Zayn Malik yunamiye Liam Payne mu gitaramo yakoreye i Leeds mu Bwongereza

Zayn Malik na Liam Payne babanye mu itsinda rya 'One Direction' ryatumye bamamara