Umufana yajyanye agahanga ka Sekuru wapfuye ku mukino,birangira begukanye igikombe

Ku wa Gatandatu w'icyumweru gishize  tariki 23 Ugushyingo 2024, nibwo ikipe ya Racing Club de Avellaneda yatsindaga ikipe ya Cruzeiro ibitego 3-1 mu mukino wa nyuma w'igikombe cya Sudamericana wakiniwe mu gihugu cya Paraguayan kuri Estadio General Pablo Rojas.

Iki ni igikombe gifatwa nka Europa League yo muri Afurika y'Epfo. Nubwo ikipe ya Racing Club de Avellaneda yegukanye igikombe ariko hari umufana wayo wavugishije benshi aho yaje kureba uyu mukino afite agahanga  ka sekuru  witabye Imana.

Ubwo uyu mufana yaganiraga n'ikinyamakuru cya ESPN, akabazwa  impamvu yahisemo kujyana aka  gahanga, yavuze ko ari aka sekuru kandi nawe akaba yarafanaga iyi kipe cyane.

Yagize ati " Uyu ni sogokuru wanjye Valentin Aguilera, umufana wa Racing byo gupfa. Racing Club 'ni urukundo rwanjye kandi ni n'urukundo rwa sogokuru".

Ibi ntabwo ari ubwa mbere bibaye kuko no muri 2019 uyu mufana yari yabikoze ku mukino ikipe ya Racing Club de Avellaneda isanzwe ikina shampiyona y'icyikiro cya mbere muri Argentine yegukaniyeho igikombe cya shampiyona.

Iyi kipe ni ubwa mbere  yari yegukanye igikombe cya Sudamericana ariko isanzwe ibitse ibikombe 18 bya shampiyona ya Argentine,ikaba ari ikipe ya gatatu ibifite inshuro nyuma ya River Plate na Boca Juniors.

Umufana w'ikipe ya Racing Club de Avellaneda yajyanye agahanga ka  sekuru witabye Imana ku mukino birangira begukanye igikombe