Gueulette yaratsinze,Jojea arata igikombe! Uko Abanyarwanda bakina hanze bitwaye mu Cyumweru gishize

Duhereye muri shampiyona y'icyiciro cya mbere muri Tunisia,ku munsi w'ejo ku Cyumweru, ikipe ya Stade de Tunisien ikinamo Mugisha Bonheur yatsindaga ikipe yitwa EGS Gafsa igitego 1-0. Muri uyu mukino uyu mukinnyi w'Umunyarwanda yari yabanje mu kibuga ndetse arangiza umukino adasimbujwe.

Kugeza ubu ikipe ya Stade de Tunisien iri ku mwanya wa 3 aho irushwa amanota 3 n'ikipe iri ku mwanya wa mbere, ikaba izasubira mu kibuga ikina na Club Africain ku wa Gatandatu w'iki Cyumweru.

Tukiri muri shampiyona y'icyiciro cya mbere muri Tunisia kandi ku munsi w'ejo ikipe ya Olimpique de Beja ikinamo Ishimwe Anicet yatsindwaga na AS Monastir ibitego 3-1.

Ntabwo  uyu  mukinnyi yigeze akoreshwa kuri uyu mukino ariko yari ku ntebe y'abasimbura. Kugeza ubu ikipe ya Olimpique de Beja iri ku mwanya wa 5 muri shampiyona, ikaba izasubira mu kibuga ikina na Tataouine ku wa Gatandatu tariki ya 30.

Muri shampiyona y'icyiciro cya mbere muri Ukraine, ikipe ya FC Kryvbas Kryvyi Rih ikinamo Bizimana Djihad ku munsi w'ejo ku Cyumweru yatsindaga FC Obolon Kyiv igitego 1-0. Kuri uyu mukino uyu Kapiteni w'Amavubi ntabwo yigeze akoreshwa kubera ko yari yawusinye bitewe n'amakarita menshi y'imihondo yari amaze kubona.

Kugeza ubu ikipe ya FC Kryvbas Kryvyi Rih iri ku mwanya wa 5, ikaba izasubira mu kibuga ikina na Polissya ku wa Gatandatu w'iki Cyumweru.

Muri shampiyona y'icyiciro cya mbere muri Azerbaijani,ku wa Gatandatu ikipe ya FC Zira ikinamo Mutsinzi Ange yatsindwaga na Neftci ibitego 2-1. 

Kuri uyu mukino ntabwo uyu myugariro w'Amavubi yakinishijwe ariko yari ku ntebe y'abasimbura. Kugeza ubu ikipe ya FC Zira iri ku mwanya wa 4 muri shampiyona, ikaba izasubira mu kibuga ikina na Sumqayit ku wa Gatandatu w'iki Cyumweru.

Muri shampiyona y'icyiciro cya mbere muri Cyprus ,ku munsi w'ejo ku Cyumweru ikipe ya AEL Limassol ikinamo Imanishimwe Emmanuel Manguende yatsindwaga na Aris Limassol invite 3-0. Kuri uyu mukino uyu myugariro w'Amavubi yari yabanje mu kibuga ndetse nta nubwo yigeze asimbuzwa.

Kugeza ubu AEL Limassol iri ku mwanya wa 13, ikaba izasubira mu kibuga ikina na Enosis Neon Paralimniou ku wa Gatandatu w'iki Cyumweru.

Ku munsi w'ejo ku Cyumweru muri shampiyona y'icyiciro cya mbere muri Macedonia, ikipe ya Brera Strumica ikinamo Rwatubyaye Abdul yanganyaga na Struga igitego 1-1. Muri uyu mukino uyu myugariro w'Amavubi yari yabanje mu kibuga ndetse nta nubwo yigeze asimbuzwa.

Iyi kipe ya Brera Strumica iri ku mwanya wa 8 muri shampiyona, izasubira mu kibuga ikina na Rabotnicki ku Cyumweru.

Muri shampiyona y'icyiciro cya Kabiri mu Bubiligi,ku munsi w'ejo ku Cyumweru ikipe ya Raal La Louviere ikinamo Samuel Gueulette yanyagiraga Lommel ibitego 5-1. 

Muri uyu mukino uyu mukinnyi w'Umunyarwanda yari yabanje mu kibuga ndetse ni nawe watsinze igitego cya mbere ku munota wa 22, anatanga umupira wavuyemo icya 4 gusa aza gusimbuzwa ku munota wa 79.

Ikipe ya Raal La Louviere iri ku mwanya wa Kabiri muri shampiyona kugeza ubu aho inganya amanota n'ikipe ya mbere, izasubira mu kibuga ikina na Eupen ku Cyumweru.

Ku wa Gatandatu ikipe ya Rhode Island ikinamo Kwizera Jojea yarataga igikombe cya shampiyona y'icyiciro cya Kabiri muri Leta zunze ubumwe z'Amerika itsindwa na Colorado Springs Switchbacks FC ibitego 3- ku mukino wa nyuma.

Kuri uyu mukino ntabwo uyu mukinnyi w'Amavubi yari yabanje mu kibuga ariko yinjiyemo asimbuye ku munota wa 46.

Ikipe ya Rhode Island yari yageze ku mukino wa nyuma nyuma y'uko ariyo yegukanye igikombe  cy'Iburasirazuba aho yakinaga na Colorado Springs Switchbacks yo yacyegukanye mu gace k'Iburengerazuba.

Samuel Gueulette yitwaraga neza afasha ikipe ye ya Raal La Louviere gutsinda 

Ikipe ya Rhode Island ikinamo Jojea Kwizera yarase igikombe cya shampiyona y'icyiciro cya Kabiri muri Leta Zunze Ubumwe za Amerika