Imbamutima z'umutoza mushya wa Man United wasitaye rugikubita

Mu ijoro ryo kuri iki Cyumweru itariki 24 Ugushyingo 2024, nyuma y’umukino we wa mbere ari umutoza wa Manchester United, yanganyije na Ipswich igitego 1-1, Amorim yavuze ko ibibazo biri mu ikipe bitazakemuka mu kanya gato.

Mu gushimangira ko urugamba rutoroshye, abafana ba Manchester United bamushyigikiye binyuze mu ndirimbo bamuririmbiye, igira iti: "Ruben Amorim, Amorim, bamuririmbira indirimbo yitwa Give it Up ya KC na the Sunshine Band. Iyi ndirimbo, yashimishije uyu mutoza, yatumye agaragaza icyizere cyo gukorana neza n’abafana mu rugendo rwo gusubiza ikipe ku murongo.

Amorim mu kiganiro n’itangazamakuru nyuma y’umukino, yavuze amagambo akakaye, ati "Turi mu gihe cy’ihinduka rikomeye, kandi birasaba kwihangana. Tuzahura n’ibibazo byinshi ariko ni ngombwa kugira ngo mu gihe kizaza tuzabe turi mu mwanya mwiza."

Uyu mutoza yemeje ko gukemura ibibazo by’ikipe bitazihuta, yashimangiye ko hakenewe ibyemezo bikomeye muri iki gihe. Ati: "Niba tudafashe ibyemezo bikomeye ubu, umwaka utaha tuzongera kwibona mu kibazo nk’iki."

Manchester United imaze igihe kinini iri mu bibazo byo kudahagarara neza muri Premier League, aho yashyizwe mu myanya yo hasi ku ngoma y’umutoza Erik ten Hag. Amorim afite inshingano zo gushyira ku murongo iyi kipe ifite amateka akomeye ariko ifite intege nke mu mikinire yayo.

Abafana b’ikipe bafite amatsiko y’impinduka vuba, ariko umutoza arabasaba kubanza kwihangana kuko urugendo rwo kugarura icyubahiro cya Manchester United rushobora kumara igihe kirekire. Amorim yizeye ko ubuhanga bwe buzatanga umusaruro mu gihe kiri imbere.

Ruben Amorim yijeje abakunzi ba Manchester United kuzubaka ikipe ariko akazabikora gake gake