Pascal Kacale wakiniye Mukura mu rugamba rwo kurwanya indwara zitandura binyuze muri Siporo -AMAFOTO

Ni igikorwa cyateguwe na Munyangondo Pascal Kacale wamamaye mu gutoza umukino wa Aerobic Step ariko akaba yaranakiniye Mukura Victory Sports muri 2013, kikaba cyitabiriwe n’abatoza batandukanye ndetse n’abandi bakunzi ba siporo ngororamubiri.

Kuri uyu wa Gatandatu abarenga 500 bari bitabiriye iyi siporo ngarukamwaka, aho igikorwa cyatangiye bakora siporo bagendeye mu njyana z’indirimbo za gakondo, gusa uko iminota yiyongeraga niko imyitozo ngororamubiri yagumye kubashyuhana.

Nyuma yo gukora imyitozo ngororamubiri yamaze amasaha atatu, umutoza akaba ari nawe watangije uyu munsi ngarukamwaka, Pascal Kacele, yavuze ko Siporo ari igikorwa cy’ingirakamaro, anakangurira abantu bose kuyikora, cyane ko igira ingaruka nziza kandi nyinshi zitandukanye ku muntu uyikora, ndetse anahumuriza abibwiraga ko siporo ikorwa n'abarenzwe.

Ati: “ Kacale Day ni igikorwa ngarukamwaka, iyi ni inshuro ya gatatu ibaye, impamvu bayise Kacare ni uko ari njye wayiteguye ariko ni siporo ihuza abasiporotifu muri rusange, mwabibonye ko hari abavuye za Rubavu, Nyamata, Kigali ndetse n’ahandi hatandukanye.

Umuntu ukora siporo ntapfa gufatwa n’indwara, kandi aba afite ubuzima bwiza, aba agaragara neza kandi asa neza''.

Pascal Kacele yanashimangiye ko uretse kuba umuntu ukora siporo adapfa gufatwa n’indwara, kandi aba afite ubuzima bwiza, ku rundi ruhande ishobora gutunga nyiri ukuyikora mu buryo bwo gukuramo amafaranga yo kumubeshaho mu buzima bwa buri munsi. Ati: “ Siporo irantunze kuko nta kindi nkora kandi ndubatse mfite urugo, siporo ni akazi mu kandi.

Ikirenzeho ni uko ari akazi uba winjiza amafaranga kandi nawe wiyitaho umubiri ukamera neza, njye navuga ko ariko kazi keza kabaho ku isi''. 

Kacele yakomeje avuga ko intego yo gukora siporo yahurije hamwe abantu benshi ari ukumenyana muri rusange no kureba aho abandi bageze bakora siporo.

Kacare yavuze ko iki gikorwa cyamwitiriwe gishigikiwe na Leta,  ndetse bakaba bari gutegura uburyo cyazaba igikorwa cyaguye imipaka kikajya cyitabirwa n’abantu babatudanye baturutse muri Afurika y’Uburasirazuba.

Kacele ndetse n’abandi batanze ubuhamya bwo gukunda siporo, bagiriye inama abantu mumva ko siporo ikorwa n’abantu bahaze, agira ati: Iyo myumvire iragoye kuyikura mu bantu, ariko dufatanyije na Leta abanyarwanda basigaye bakunda Siporo, kuko niyo ugeze mu duce tw’icyaro ubona bakora siporo.

Mukabirori Grace na Sibomana Dier nabo ni abakunzi ba siporo bari bitabiriye iki gikorwa cya Kacale Day 2024, bakaba bashimangiye ko kuva batangira gukora siporo byabagiriye akamaro gakomeye cyane, kubera ko buri umwe yatakaje ibiro birenga 10 ndetse bakaba bishimira uko imibiri yabo iteye kugeza ubu.

Nk’uko bigaragara mu butumwa bwa buri munsi bwa Minisiteri y’Ubuzima, Siporo ni kimwe mu bisubizo by'ingenzi mu kurwanya indwara zitandura, zirimo diyabete, umuvuduko ukabije w’amaraso, indwara z’umutima n’umubyibuho ukabije.

Iyo umuntu akora siporo kenshi, bituma amaraso atembera neza, umubiri ugakomeza kugira imbaraga, kandi igipimo cy’imisemburo itera guhangayika (stress) kikagabanyuka.

Nanone, siporo ifasha mu kugumana ibiro bikwiye no kongera ubwirinzi bw'umubiri.

Kacele Day 2024 yabereye muri Lycee de Kigali

Pascal Kacale yasobanuye ko siporo ari ingirakamaro mu mubiri w'umuntu, kandi ikaba ishobora gutunga nyiri ukuyikora