Man City yakuye Man United ku ibere! Uduhigo twaraye twandikiwe muri UEFA Champions League

Ku mugoroba wo kuwa Gatatu taliki ya 24 Ukwakira 2024 ni bwo hasozwaga gukinwa imikino yo ku munsi wa Gatatu ya UEFA Champions League.

Ikipe ya Manchester City kuri Etihad Stadium yanyagiraga ikipe ya Sparta Prague yo muri Czech Republic ibitego 5-0. Ni ibitego byatsinzwe na Phil Foden ku munota wa 3, Erling Haaland ku munota wa 58 n'uwa 68, John Stones ku munota wa 64 ndetse na Mathieus Nunez ku munota wa 88 kuri penariti.

Uyu mukino wandikiwemo amateka aho ikipe ya Manchester City yahise ikuraho agahigo kari gafitwe na Manchester United ko kumara imikino myinshi idatsindwa. Iyi kipe yahise yuzuza imikino 26 mu gihe Manchester United yo yamaze imikino 25 itazi uko gutsindwa bisa muri iyi mikino hagati ya 2007 na 2009.

Izindi kipe zigeze kumara imikino myinshi zitaratsindwa muri iri rushanwa ni Ajax na FC Bayern Munich zo zamaze imikino 19. Ajax yo mu Buhorandi yabikoze hagati ya 1994 no mu 1996 ku gihe FC Bayern Munich yo mu Budage yabikoze hagati ya 2001 na 2002.

Muri uyu mukino kandi rutahizamu w'ikipe ya Manchester City, Erling Haaland nyuma yo gutsinda ibitego 2 yahise yandika amateka yo kuba umukinnyi utsinze ibitego 44 mu mikino micye muri UEFA Champions League. Ibi bitego yabigejeje mu mikino 42 amaze gukina.

Ibi bitego amaze gutsinda ku myaka 24 arabinganya n'ibyatsinzwe na Drogba mu buzima bwe bwose muri UEFA Champions League, bikaruta ibya Neymar umaze gutsinda 43 ndetse na Del Piero watsinze ibitego 42.

Ibi bitego byose bimaze gutsindwa na Erling Haaland harimo 8 yatsinze akinira Sulzburg,15 akinira Borussia Dortmund na 21 akinira Manchester City.

Ku mukino ikipe ya FC Barcelona yanyagiragamo FC Bayern Munich ibitego 4 bya Roberto Lewandowski ku munota wa 36 na Raphinha ku munota wa 1, uwa 45 n'uwa 56 kuri 1 cya Harry Kane ku munota wa 18, naho handikiwemo amateka.

Raphinha yabaye umukinnyi wa Kane utsinze FC Bayern Munich ibitego 3 wenyine mu mikino ya UEFA Champions League. Ni nyuma ya Cristiano Ronaldo wabikoze muri 2017 akinira Real Madrid, Sergio Agüero wabikoze muri 2014 akinira Man City na Roy Makaay wabikoze muri 2002 akinira Deportivo La Coruña.

Gusa uyu mukinnyi we yakoze amateka yo kuba ariwe wa mbere wayitsinze mu gihe gito. Raphinha kandi yanditse amateka yo kuba umukinnyi wa Kane ukomoka muri Brazil utsindiye FC Barcelona ibitego 3 muri UEFA Champions League nyuma ya Neymar wabikoze muri 2013, Ronaldinho wabikoze muri 2005 na Rivaldo wabikoze muri 2000.

Uyu mukinnyi kandi yakoze amateka yo kuba umukinnyi wa mbere utsinze igitego FC Bayern Munich ku munota wa mbere muri UEFA Champions League.

FC Bayern Munich ni ubwa mbere yari yinjijwe ibitego 3 mu mikino itari iyo gukuranwamo muri UEFA Champions League ndetse ni n'ubwa mbere yari imaze imikino 41 idatsindwa mu mikino itari iyo gukuranwamo.

Raphinha yanditse amateka mashya muri UEFA Champions League 

Erling Haaland yanditse amateka yo kuzuza ibitego 44 mu mikino micye 

Manchester City yakuyeho agahigo kari gafitwe na Manchester United ko kumara imikino myinshi idatsindwa muri UEFA Champions League