Vinicius Junior arabizi ko ari we uzegukana Ballon d'Or

Taliki ya 28 Ukwakira mu nyubako ya Chatelet Theatre i Paris mu gihugu cy'u Bufaransa ni bwo hategerejwe ibirori by'akataraboneka bizangirwamo igihembo cya Ballon d'Or ya 2024.

Mu kwezi gushize ni bwo hagiye hanze abakinnyi 30 bazavanwamo umwe uyihabwa ariko kuri ubu ikinyamakuru gikomeye cyo muri Espagne cya Marca cyatangaje ko Vinicius Junior yamaze kumenyeshwa n'abategura iki gihembo cya Ballon d'Or ko ari we uzacyegukana bidasubirwaho.

Uyu mukinnyi w'imyaka 24 agiye kwegukana iki gihembo nyuma y'uko yari ayihanganiye n'abakinnyi barimo Jude Bellingham bakinana muri Real Madrid ndetse na Rodrigo ukinira Manchester City n'ikipe y'igihugu ya Espagne.

Agiye kucyegukana kandi nyuma y'uko ikiragano cya Cristiano Ronaldo na Lionel Messi cyari cyarihariye Ballon d'Or mu myaka 15 ishize gisa nk'aho kiri gushyirwaho akadomo dore bwa mbere kuva muri 2004 bose batagaragaye muri 30 bayihatanira.

Mu mwaka ushize w'imikino Vinicius Junior yakiniye Real Madrid imikino 26 muri shampiyona atsindamo 15 anatanga imipira 5 yabivuyemo naho muri UEFA Champions League akinamo imikino 10 atsindamo ibitego 6. Yayifashije kwegukana igikombe cya shampiyona ndetse n'icya UEFA Champions League.

Vinicius Junior agiye kuba umunya-Brazil wa kabiri wegukanye Ballon d'Or nyuma ya Kaka wayegukanye muri 2007 ubwo yakiniraga AC Milan.

Vinicius Junior arabizi ko ari we uzegukana igihembo cya Ballon d'Or ya 2024

Vinicius Junior agiye kwegukana Ballon d'Or