Ishimwe Anicet yatangajwe nk'umukinnyi mushya w'ikipe yo muri Tunisia

Iyi kipe niyo yamutangaje mu ijoro ryo kuwa Gatanu taliki ya 21 Nzeri 2024 ibinyujije ku rukuta rwayo rwa Facebook. Yatangaje ko yamusinyishije amasezerano y'imyaka 3.

Ikipe ya Olympique de Beija Ishimwe Anicet yasinyiye yashinzwe mu 1929, ikaba ikinira imikino yakiriye kuri Stade yitwa Boujemaa Kmiti Stadium ifite ubushobozi bwo kwakira abantu ibihumbi birenga 15.

Iyi kipe imaze kwegukana ibikombe birimo 3 by'igihugu, 2 bya Super Cup na 2 bya shampiyona y'icyiciro cya kabiri muri Tunisia.

Imaze gukina CAF Confederation Cup inshuro 2, gusa hose yagarukiye mu mikino y'ijonjora ry'ibanze ariko mbere yuko CAF Winer's Cup ihindurwa izina ngo ibe CAF Champions League yageze muri 1/2 mu 1994.

Mu mwaka ushize w'imikino Boujemaa Kmiti Stadium yabaye iya 7 muri shampiyona mu makipe 14 naho kuri ubu nyuma y'imikino 2 imaze gukinwa ikaba iri ku mwanya wa 1 n'amanota 6.

Ishimwe Anicet abonye ikipe nshya nyuma y'uko mu mwaka ushize ari bwo yatandukanye na APR FC ariko kugeza ubu akaba atari yakabonye ikipe nshya ndetse hakaba hari n'amakuru yigeze kuvugwa ko ashobora no kureka gukina ruhago burundu.

Uyu mukinnyi yakuriye mu bato ba APR FC akaba yarazamuwe muri APR FC nkuru muri 2019 mbere y'uko atandukana nayo mu mwaka ushize. Yerekeje muri iyi kipe yo muri Tunisia abifashijwemo n'uwahoze ari Umutoza wungirije muri APR FC ari we Ben Mousa ndetse akaba yaranamutoje.

Ishimwe Anicet yatangajwe nk'umukinnyi mushya w'ikipe ya Olympique de Beija

Ishimwe Anicet yasinye amasezerano y'imyaka 3