Harimo Ryan Giggs! Abanyabigwi muri Ruhago bakiniye ikipe imwe gusa

Akenshi usanga abakinnyi bahinduranya amakipe kugira ngo batware ibyo batatwaye mu makipe bakiniraga, bamwe bakayahinduranya ku bw'amaco y'inda, aho baba bagiye gushaka ibya Mirenge ku Ntenyo. Nubwo ibyo bibaho, uyu munsi tugiye kugaruka ku bakinnyi beza batahinduye amakipe, kandi aho bari bakubaka amazina akomeye. 

1.Paul Scholes - Manchester United

Paul Scholes ni umwe mu bakinnyi bakiniye ikipe imwe mu buzima bwabo. Kuva mu 1993 kugera 2013 uyu mugabo yamenyekanye muri Manchester United gusa. 

Ubwo yakiniraga Manchester United, Paul Scholes yayikiniye imikino 718 ayitsindira ibitego 155. 

Mu bikombe Paul Scholes yatwaranye na Manchester United harimo Premier League 11, FA Cup 3, League Cup 2, UEFA Champions League 2, FIFA Club World Cup 1 na Intercontinental Cup 1. 

2. Ryan Giggs - Manchester United

Ryan Giggs nawe wamamaye akina mu kibuga hagati ndetse no ku mpande muri Manchester United, kuva mu 1990 kugera mu  2014 nta yindi kipe yakiniye uretse Manchester United. 

Muri icyo gihe, Ryan Giggs yakiniye Manchester United imikino 963, ayitsindira ibitego 168. 

Mu bikombe Ryan Giggs yatwaranye na Manchester United harimo Premier League 13, FA Cup 4, League Cup 3, UEFA Champions League 2, FIFA Club World Cup 1 na  Intercontinental Cup 1

3. Jamie Carragher - Liverpool

Myugariro Jamie Carragher wamamaye muri Liverpool, nawe nta yindi kipe yakiniye uretse Liverpool kuva mu 1996 kugeza 2013. 

Ubwo yakiniraga Liverpool, Jamie Carragher yayikiniye imikino 737, ayitsindira ibitego bine. 

Mu bikombe Jamie Carragher yatwaranye na Liverpool,  nta Premier League irimo, gusa yatwaye FA Cup 2, League Cup 3, UEFA Champions League 1, UEFA Cup 1, UEFA Super Cup 2 na FA Community Shield 2. 

4. Paolo Maldini - AC Milan

Myugariro Paolo Maldini wamamaye muri AC Milan, uyu afatwa nk'imana i Milan, kuko yakiniye AC Milan gusa.  

Kuva mu 1985 kugera mu 2009 nibwo Maldini yakiniye Milan AC, ayikinira imikino 902 ayitsindira ibitego 33.

Mu gihe cya Paulo Maldini, AC Milan yararyanaga cyane. Yatwaranye nayo Serie A 7, Coppa Italia 1, Supercoppa Italiana 5, UEFA Champions League 5, UEFA Super Cup 5, Intercontinental Cup 2, na FIFA Club World Cup 1. 

5. Gary Neville - Manchester United

Myugariro Gary Neville nawe yamamaye muri Manchester United kuva mu 1992 kugeza mu 2011. Ku buzima bwe, ntayindi kipe yakiniye uretse Manchester United. 

Myugariro Gary Neville watsinze ibitego birindwi, yakiniye Liverpool imikino 602. 

Mu bikombe uyu umunyabigwi yatwaranye na Liverpool harimo Premier League 8, FA Cup 3, League Cup 2, UEFA Champions League 2, FIFA Club World Cup 1 na  Intercontinental Cup 1. 

6. Francesco Totti - Roma

Totti wamamaye akina mu kibuga hagati muri AS Roma, nawe ubuzima bwe akina umupira w'amaguru nta yindi kipe yakiniye uretse  AS Roma gusa kuva mu 1992 kugera mu 2017. 

Muri icyo gihe, Totti yakiniye Roma imikino 786, ayitsindira ibitego 307. Mu bikombe Totti yatwaranye na AS Roma, harimo Serie A 1, Coppa Italia 2 na Supercoppa Italiana 2. 

7. Carles Puyol - Barcelona

Myugariro Puyol wamamaye muri FC Barcelona gusa, yayikiniye kuva mu 1999–2014. Muri icyo gihe, Puyol yakiniye Barcelona imikino  593, ayitsindira ibitego 19.

Mu bikombe Carlos Puyol yatwaranye na FC Barcelona harimo La Liga 6, Copa del Rey 2, Supercopa de España 6, UEFA Champions League 3, UEFA Super Cup 2, na FIFA Club World Cup 2.