Bite bya Liverpool ku isoko ry'igura n'igurisha?

Umwaka w'imikino ushize, Liverpool yasoje ikubita agatoki ku kandi igaragaza ko izitwara neza ku isoko ry'igura n'igurisha, cyane ko kugira abakinnyi bake biri mu byatumye Jurgen Klopp atakaza igikombe cya Shampiyona ya English Premier League agasoreza ku mwanya wa gatatu.

Jurgen Klopp yasoje umwaka w'imikino ahita atandukana na Liverpool, aho yahise ikomezanya na Arne Slot watozaga Feynood mu Buhorandi.

Kugeza ubu Liverpool ya Arne Slot iri kwitegura imikino ya Pre Season muri Leta Zunze Ubumwe za Amerika, gusa kugeza izi saha nta mukinnyi uzwi Liverpool iragaragaza ko yaguze uzaza gukora itandukaniro mu mwaka w'imikino utaha wa 2024-25.

Nyamara mu mpeshyi yashize, Liverpool ni ikipe yari yitwaye neza kuko yari yatanze miliyoni 95 ku bakinnyi bo mu kibuga hagati, aribo Alexis Mac Allister wari muri Brighton na Dominik Szoboszlai wakiniraga RB Leipzig.

Ibyo bidahagije, Jurgen Klopp yari yaguze Wataru Endo wakiniraga Stuttgart na Ryan Graveniberch wari muri Bayern Munich, abo bose abazana gukina mu kibuga hagati nubwo imvune zamubanye ibibazo.

Kuvunikisha abakinnyi benshi, byakoze kuri Jurgen Klopp asoza umwaka w'imikino ari uwa gatatu inyuma ya Arsenal na Manchester City yatwaye igikombe. 

Nubwo nta kintu Liverpool irakora ku isoko ry'igura n'igurisha muri iyi mpeshyi, abakinnyi batandukanye bo bamaze kuyisezera bivuze ko iri mu bihombo.

Abarimo Thiago Alcântara na Joel Matip bamaze gutangaza ko bazatandukana na Liverpool. Alcântara we yatangaje ko ibyo gukina umupira w'amaguru yabivuyemo ahubwo agiye gutoza, mu gihe mugenzi we Matip ari kurwana no kubona ikipe nshya.

Liverpool yatangaje ko izaba itandukanye n'umuzamu Calvin Ramsey, agatizwa mu ikipe ya Wigan Athletic ikina mu cyiciro cya kabiri Championship, naho uwitwa Adrian arashaka gutandukana nayo akajya muri Real Betis muri Esipanye.

Liverpool ya Arne Slot ikomeje kugenda biguruntege ku isoko ry'igura n'igurisha