Rita Ange Kagaju yahawe impamyabumenyi muri Amerika- AMAFOTO

Uyu mukobwa yagaragaje ko yakozwe ku mutima no kuba yabashije kurangiza urugendo rw'amasomo yari amazeho imyaka ine. Yigaga ibijyanye na ‘Etude d'invironment,’ ‘Sociology' na 'Global Studies'.

Yahisemo kwiga aya masomo 'kubera ko ari ibintu nkunda, kandi byose biruzuzanya'. Ati "Nko kwiga 'Sociology' nahoze ndi umuntu wibaza ngo kuki uyu muntu adafite inkweto uyu nguyu akaba afite imodoka ya Lamborghini kandi bose bari mu gihugu kimwe, kandi bose bakora uko bashoboye? Nshaka kumva uko sosiyete igufata n'uko nawe uyifata."

Amasomo ya 'Global Studies' akubiyemo ibijyanye n'indimi ndetse n'ubwanditsi, ni mu gihe ‘Etude d'invironment’ ijyanye no kumenya imihindagurikire y'ikirere.

Yifashishije konti ye ya Instagram, yumvikanishije ko rwari urugendo rutoroshye ariko rwashobotse. Rita yashimye Imana ‘ku bwa buri kimwe’, kandi yishimira inshuti yungutse muri uru rugendo kuko ‘ari kimwe mu byiza nagezeho birenze izi mpamyabumenyi nahawe’.

Wari umwanzuro ugoye!

Uyu mukobwa yagiye kwiga muri Amerika nyuma y'igihe cyari gishize yinjiye mu muziki, ndetse abantu bari batangiye kumenya ibihangano bye anakorana n'abahanzi banyuranye.

Yavuze ko kujya kwiga muri kiriya gihugu rwari urugendo rusaba kwigomwa. Ati "Nkigerayo byari bikomeye kugira ngo niyumvishe uburyo mvuye mu Rwanda nkaba mpagaritse umuziki. Byari bimeze nk'aho mbihagaritse, ariko umujyanama wanjye yarambwiye ati 'ntabwo bihagaze' kuko nagiye no mu gihe cya Covid-19."

Mu kiganiro na Yago TV Show, uyu mukobwa yigeze kuvuga ko akigera muri Amerika, yagiye yitabira ibitaramo by'abahanzi banyuranye, ndetse afata igihe cyo gukomeza gukurikirana ibihangano by'abahanzi nyarwanda.

Ati "N'ubwo umuntu yasohora Album nkaba numva neza ko ari njyana nsanzwe nkora, ndayumva mu rwego rwo kumushyigikira, kuko nzi imvune bigira mu gukora umuziki."

Uyu mukobwa yatangiye umuziki agisoza amashuri yisumbuye. Ageze muri Amerika yakurikiranye amasomo ye, ariko kandi ashaka n'akazi ko gukora ka buri munsi kamufashije gukomeza ubuzima.

Yumvikanishije ko muri Amerika yahungukiye inshuti, ariko kandi ntiyorohewe no kumenyera ubuzima bwaho, ahanini bitewe n'uko imibereho y'abanyamerika irimo cyane kwihugiraho.

Rita Ange Kagaju avuga ko nyuma yo gusoza amasomo ye ya Kaminuza, agiye gukomeza gushyira imbaraga mu rugendo rwe rw'umuziki. Ati "Umuziki ni kimwe mu byamfashije kwisanga ngeze ku ishuri, ni nk'inshuti udahamagara [...] Nabanje kubara nk'aho nawuretse, ariko naje gusanga umuziki undimo."

Muri Gicurasi 2023, uyu mukobwa yari mu Rwanda, aho yasize akoze indirimbo nyinshi yizera ko zizaba zigize Album yitezeho kuzamufasha kongera kwisanga mu kibuga cy'umuziki.

Rita Ange Kagaju yagaragaje ko yatewe ishema no gusoza amasomo ye ya Kaminuza

Kagaju yavuze ko mu rugendo rw’imyaka itatu yari amaze muri Amerika yishimira inshuti yungutse n’ubuzima yabayemo

Kagaju yavuze ko kujya kwiga cyari icyemezo gikomeye gufata, kuko yari amaze igihe ari mu muziki

Kuva mu ntangiriro za Mutarama 2021, Rita Ange Kagaju yabarizwaga muri Leta Zunze Ubumwe za Amerika

 

Uyu mukobwa yagiye kujya muri Amerika asize asohoye Album ya mbere yise “Sweet Thunder” yakubiyeho indirimbo 16 n’inyongezo imwe (Bonus)

KANDA HANO UREBE AMASHUSHO Y'INDIRIMBO 'NO OFFENSE' YA RITA ANGE KAGAJU