Agezweho: Arsenal yasubije amerwe mu isaho, Man United Irifuza myugariro wa Barcelona

Amakuru agezweho mu mikino, avugwa ku isoko ry'igura n'igurisha tuyahereye mu Kinyamakuru Express. Cyatangaje ko amakipe yo mu Bwongereza arangajwe imbere na Liverpool, Chelsea, Arsenal na West Ham, yifuza Umutaliyani, Riccardo Calafiori w'imyaka 23 y'amavuko. Uyu ni myugariro wa Bologna aho ikipe akinira imwifuzamo Miliyoni 40£.

Ibinyamakuru bitandukanye nka Gazetta dello Sports, BBC Sports, One Football byahurije ku nkuru igaruka kuri gapapu ikipe ya Juventus yakoreye Arsenal, birangira iyitwaye Umunya-Brazil wakiniraga Aston Villa, Douglas Luiz. 

Douglas Luiz, ni umwe mu bakinnyi ikipe ya Arsenal yari ikeneye ku isonga, gusa Juventus yamaze kumutangaza nk'umukinnyi wayo. 

Football Transfer yatangaje ko Manchester United ishaka gukomeza ubwugarizi bwayo, bityo irashaka Umunya-Uruguay ukinira FC Barcelona, Ronald Araujo.

Ronald Araujo Manchester United inamukeneyeho gukemura ikibazo cya ba myugariro b'iyi kipe bahora baravunitse.

Sports yo muri Espagne yavuze ko FC Barcelona ikomeje kunyurwa n'imikinire ya Nico Williams muri Euro. Nico Williams wa Athletic Bilbao, akomeje gufasha ikipe y'igihugu cye kwitwara neza mu mikino ya Euro iri kubera mu Budage cyane ko yanayifashije kugera muri kimwe cya Kane.

Athletic yavuze ko Leicester City iherutse kuzamuka mu cyiciro cya mbere  muri English Premier League, yifuza umwana wa Chelsea w'imyaka 18 y'amavuko, Michael Golding ukina mu kibuga hagati.

Daily Mail yatangaje ko Newcastle United yifuza umuzamu ukomoka mu Bugereki wa Nottingham Forest, Odysseas Vlachodimos.

Fabrizio Romano, yatangaje ko umutoza wa Newcastle United Eddie Howe, yasabye ubuyobozi bw'iyi kipe kurekura Umunya-Suede, Alexander Isak  kugira ngo iyi kipe izamugurishe amafaranga menshi. Isak akomeje kwifuzwa na Chelsea isigaye itozwa na Enzo Maresca ukomoka mu Butaliyani.

Football Insider yatangaje ko Tottenham Hotspur ishaka kongera amasezerano ya Kapiteni wayo, akaba na rutahizamu ukomoka muri Korea y'Epfo , Son Heung-min. Tottenham ishaka kumwongerera amasezerano azarangira mu 2026.

Douglas Luiz wari utegerejwe muri Arsenal, byarangiye ayobeye muri Juventus 

Manchester United irifuza umunya-Uruguay, Ronald Araujo wa FC Barcelona