Bayern Munich yamaze kumvikana na Burnley, amafaranga azishyurwa kugira ngo yegukane umutoza w'iyi kipe yo mu Bwongereza ukomoka mu Bubiligi, Vincent Kompany.
Nyuma y'icyumweru kimwe Bayern Munich igaragaje ko yifuza umutoza wa Burnley ukomoka mu Bubiligi, Vincent Kompany, imbogamizi yabaye ni amasezerano Kompany yari afite azarangira muri 2028.
Amakuru dukesha Ikinyamakuru ESPN, avuga ko Bayern Munich yamaze kumvikana na Burnley ko izatanga Miliyoni 10£ kugira ngo yegukane Vincent Kompany.
ESPN yakurikiranye iyi nkuru, yatangaje ko Bayern Munich nimara kwishyura Miliyoni 10£ muri Burnley, Vincent Kompany azasinya amasezerano y'imyaka itatu atoza Bayern Munich, aho azasimbura Thomas Tuchel.
Vincent Kompany wabaye myugariro ukomeye wa Manchester City, naramuka abaye umutoza wa Bayern Munich, izaba ari ikipe ya gatatu atoje, nyuma yo gutoza Anderlecht yo mu Bubiligi, Burnley yo mu Bwongereza na Bayern Munich mu Budage.
Mu byo Vincent Kompany yagezeho ari umutoza, yatwaye Shampiyona y'icyiciro cya kabiri mu Bwongereza afasha Burnley kuzamuka mu cyiciro cya mbere mu mwaka w'imikino 2022-2023, gusa ntiyagitinzemo kuko mu mwaka w'imikino 2023-24, Burley yongeye gusubira mu cyiciro cya kabiri isoreje ku mwanya wa 19.
Bayern Munich yatekereje umutoza Vincent Kompany nyuma yo kwegera abarimo Ralf Rangnick, Xabi Alonso, Julian Nagelsmann bikarangira bayiteye utwatsi.
Bayern Munich yumvikanye na Burnley ko izatanga Miliyoni 10£ ku mutoza Vincent Kompany
Eng
RSS 
TANGA IGITECYEREZO