Umutoza wo muri APR FC yitabye Imana

Uyu mutoza wakomokaga muri Tunisia yitabye Imana kuri uyu wa Kabiri taliki 2 Mata 2024 aguye iwe mu rugo, gusa icyo yazize ntabwo cyari cyamenyekana.

APR FC ibinyujije ku mbuga nkoranyambaga zayo yihanganishije umuryango w'uyu mutoza gusa bavuga ko impamvu z'urupfu rwe zitari zamenyekana. 

Banditse bati: "Mu kababaro kenshi, Ubuyobozi bwa APR FC buratangaza ko umutoza wayo wari ushinzwe kongerera abakinnyi imbaraga Dr Adel Zirane yitabye Imana.

Impamvu z’urupfu rwe ntiziramenyeka. Twihanganishe umuryango we ndetse n’abakunzi ba APR FC, Imana imuhe iruhuko ridashira".

Usibye ikipe ndetse n'abakinnyi batandukanye bagiye berekana ko bashenguwe n'urupfu rw'uyu mutoza binyuze ku mbuga nkoranyambaga.

Dr Adel Zrangusa yari yarageze mu ikipe y'Ingabo z'igihugu mu mpeshyi y'umwaka ushize akaba yari yarasinye amasezerano y'umwaka.

Mbere yo kuza gutoza muri APR FC yanyuze mu makipe arimo Etoile Sportif du Sahel y'iwabo muri Tunisia, Al Ain yo muri Arabie Saoudite, Al-Wehdat Sportif Club yo muri Jordanie ikipe y’Igihugu ya Mauritania ndetse na Simba SC yo muri Tanzania.