Mvukiyehe Juvenal yasubije Kiyovu Sports ibikoresho birimo n’imodoka

Ni igikorwa cyaje gikurikira ihererekanyabubasha ryabaye ejo ku wa Kabiri hagati ya Bwana Juvenal n’ubuyobozi bwasigiwe Kiyovu Sports nyuma y’igenda rya Ndolimana Jean Francois Regis “General” wasohotse muri iyi kipe nyuma y’amezi atandatu (6) yonyine ari Perezida w’umuryango wa Kiyovu Sports [Kiyovu Sports Association].

Ibi kandi bibaye mu gihe hari amakuru yavugaga ko uyu “Mvukiyehe Juvenal ashobora gusubira muri iyi kipe yo ku Mumena” bijyanye n’uko kugera ubu itarabona umuyobozi ndakuka.

Ikindi babishingiragaho, ni uko  General atakibarizwa muri iyi kipe, kandi ari we byavugwaga ko bari bafitanye ibibazo by’ubwumvikane buke n’ubushingiye ku miyoborere.

Ku ruhande rumwe amakuru avuga ko impamvu iri hererekanyabubasha ryatinze gukorwa ari uko “Juvenal yasabaga ubuyobozi buragijwe Kiyovu Sports muri iyi minsi ko byakorwa bikava mu nzira, ariko bwo bugakomeza kubigendamo biguru ntege.

 Ku rundi ruhande amakuru yongera kuvuga ko ahubwo no kugira ngo iki gikorwa kibe, ari uko Juvenal yabihatirijwe na RIB nyuma yo kwakira ikirego giturutse muri Kiyovu Sports.

Mvukiyehe Juvenal yageze muri Kiyovu Sports tariki 27 Nzeri 2020, avaho muri 2023, yegujwe maze asimburwa na Ndolimana Jean Francois Regis “General” na we wahise avaho nyuma y’amezi atandatu.

Ku ngoma ya Juvenal Kiyovu Sports yatwaye igikombe kimwe, kiri no mu byo yabasubije, ndetse ikipe ye iba iya kabiri muri shampiyona ebyiri zikurikiranya, aho ibikombe byegukanwaga n’ikipe y’Ingabo z’Igihugu, APR FC.

Mvukiyehe Juvenal yasubije Kiyovu Sports imodoka yari yarisubije

Juvenal yasubije Kiyovu Sports n'imyambaro yayo yari abitse