Kuri uyu wa Kabiri no ku wa Gatatu, ku mugabane w'u Burayi harasubukurwa imikino ya kimwe cya Munani muri UEFA Champions League. Manchester City yatwaye igikombe giheruka, izacakirana na FC Copenhagen yo muri Denmark.
Ikipe ya Arsenal, byitezwe ko kera kabaye, ishobora kuzagera muri kumwe cya Kane muri UEFA Champions League, nyuma y'uko imaze imyaka 14 itahakandagira.
Muri kimwe cya munani cya UEFA champions league, hari hitezwemo ukwigaragaza kw' abakinnyi babiri bakomoka mu Bwongereza, abo ni Jude Bellingham wa Real Madrid na Harry Kane wa FC Bayern Munich. Gusa Jude Bellingham ntabwo akigaragaje, kubera imvune yagize mu Kagombambari.
Harry Kane we ari mu rugamba rwo kuzatwara igikombe cye cya mbere mu mateka ye, iyi akaba ari nayo mpamvu yatumye ava muri Tottenham Hotspurs akajya muri Bayern Munich.
Kugeza ubu, Harry Kane arasingizwa mu Budage. Amaze gukinira Bayern Munich imikino 28, amaze kuyitsindira ibitego 28 ndetse yatanze imipira Umunani yabyaye ibitego.
Ubwo Bayern Munich yayoboraga itsinda rya A muri UEFA Champions League idatsinzwe umukino n'umwe, mu mikino itandatu, Harry Kane yatsinze ibitego bine, anatanga imipira itatu yabyaye ibitego.
Jude Bellingham we, ntabwo aza kugaragara ku mukino wa LB Leipzig kubera imvune yagize mu Kagombambari. Gusa mu mikino y'amatsinda Jude Bellingham yakiniye Real Madrid imikino itanu, atsinda igitego bine, atanga imipira itatu yabyaye ibitego.
Kugeza ubu Jude Bellingham we muri Real Madrid, kuva yayigeramo, amaze kuyikinira imikino 29, yayitsindiye ibitego 20, ndetse anatanga imipira Umunani yabyaye ibitego.
Imvune ya Jude Bellingham, izatuma adafasha Real Madrid muri Champions League
Kwitwara neza kwa Erling Haaland
Mu mwaka w'imikino ushyize, rutahizamu wa Manchester City Erling Haaland, niwe watsinze ibitego byinshi muri UEFA Champions League, dore ko yatsinze ibitego 12 mu mukino 11 yakiniye Manchester City.
Kugeza ubu, Erling Haaland yatsinze ibitego Bitanu mu mikino y'amatsinda ya UEFA champions league, gusa abinganya n'abandi bakinnyi barimo Antoine Griezmann na Alvaro Morata ba Atlético Madrid, na Rasmus Hojuland wa Manchester United.
Kugeza ubu, muri abo bakinnyi bafite ibitego bitanu, Rasmus Hojuland wa Manchester United nta kindi azongeraho, kubera ko ikipe ye yamaze gusezererwa muri aya marushanwa.
Manchester City kandi ifite abandi bakinnyi bafite ibitego byinshi, aho hari Julian Alvarez unganya na Gabriel Jesus wa Arsenal ibitego bine na Phil Foden unganya na Bukayo Saka wa Arsenal ibitego bitatu.
Rasmus Hojuland uri mu bakinnyi bafite ibitego byinshi mu matsinda ya UEFA Champions league, ntabwo azagaragara muri kimwe cya munani, kubera ko Manchester United yasezerewe rugikubita
Bimwe mu byatunguranye
FC Barcelona itozwa na Xavi Hernandez, yongeye kugaragara muri kimwe cya munani muri UEFA Champions League, nyuma y'uko yari imaze imyaka itatu idakandagiramo.
Ikipe ya Paris Saint-Germain yo mu Bufaransa na Real Sociedad yo muri Espagne, bizahurira muri kimwe cya munani, ni ku nshuro ya mbere Aya makipe yombi azaba ahuriye mu marushanwa ya UEFA Champions League.
Brussia Dortmund Kandi mu mikino ya kimwe cya munani, izaba ifite Jadon Sancho uherutse kwangwa na Manchester United, agafata umwanzuro wo gusubira I Dortmund.
FC Barcelona iheruka gutwara iki gikombe muri 2015, yari imaze imyaka itatu idakandagira muri kimwe cya munani
Uko imikino yose iteganyijwe muri kimwe cya munani muri UEFA Champions League
FC Copenhagen vs Manchester City
RB Leipzig vs Real Madrid
Lazio Roma vs Bayern Munich
Paris St-Germain vs Real Sociedad
Inter Milan vs Atletico Madrid
PSV Eindhoven vs Borussia Dortmund
FC Porto vs Arsenal
Napoli vs FC Barcelona
Erling Haaland na Harry Kane, biteguye gufasha amakipe yabo muri kimwe cya munani cya UEFA Champions League
TANGA IGITECYEREZO