Ikipe y'igihugu ya Brazil ishobora gufatirwa ibihano

Ku wa Gatatu tatiki 22 Ugushyingo 2023 , nibwo kuri sitade ya Maracana habereye uyu mukino maze urangira ari ikipe y'igihugu y'igihugu ya Argentine itsinze igitego 1-0.  

Mbere y'uko umukino utangira habayeho akavuyo mu bafana bo ku mpande zombi bararwana bituma Polise yo muri Brazil ibajyamo kugira ngo ibakize ariko biranga bituma bitabaza inkoni batangira kubakubita gusa bakibasira abafana ba  Argentine cyane.

Ibi abakinnyi ba Argentine barabibonye bava mu kibuga bavuga ko barakina ari uko imirwano yahagaze bituma umukino utangira utinzeho iminota 30 ndetse na nyuma abarimo Lionel Messi berekana ko batishimiye uburyo abafana babo bakubiswemo.

Kuri ubu impuzamashyirahamwe y'umupira w'amaguru ku Isi, FIFA yatangiye gukora iperereza kuri iki kibazo nk'uko ikinyamakuru Daily Mail kibyandika. 

Mu mategeko ya FIFA agenga imyitwarire, ku ngingo 17 bavuga ko ikipe yakiriye umukino aba ariyo iba igomba gucunga umutekano mbere y'umukino,mu mukino ndetse na nyuma yaho.

Kuba Brazil yarananiwe gucunga umutekano bikageraho abafana barwana bishobora gutuma ihanishwa ibihano bitandukanye birimo gukurwaho amanota ndetse no gukinira muri sitade itarimo abafana mu mukino bakiriye.

Mu gihe ubwo FIFA yafata umwanzuro wo guhanisha ikipe y'igihugu ya Brazil kuyikoraho amanota byaba ari ibintu bitari byiza bijyanye n'ukuntu imaze iminsi yitwara kubera ko mu mikino 6 bamaze gukina yo gushaka itike y'Igikombe cy'Isi ubu bafitemo amanota 7 gusa.

Ikipe y'igihugu ya Brazil ishobora guhanwa bitewe n'ikibazo cy'umutekano muke cyabaye mu bafana ku mukino bari bakiriyemo Argentine 

Bamwe mu bafana barakubuswe barakomereka

Lionel Messi ari mu bakinnyi byababaje kuba abafana babo barakubiswe na Polisi yo muri Brazil