Cole Palmer, Rico Lewis na Ezri Konsa bahamagawe mu ikipe y'igihugu y'u Bwongereza igitaraganya

Abo bakinnyi bakiri bato, bungukiye mu mvune za James Maddison, Callum Wilson na Lewis Dunk, bakuwe mu ikipe y'igihugu y'u Bwongereza kubera imvune. Ubwongereza buritegura imikino yo gushaka itike ya Euro ya 2024.

Rutahizamu wa Chelsea Cole Palmer, na Myugariro wa Manchester City Rico Lewis, aba bombi bari basanzwe bakinira ikipe y'igihugu y'u Bwongereza mu bana batarengeje imyaka 21. 

Ubwongereza buri kwitegura imikino ibiri, uwa Malta na Macedonia y'amajyaruguru izaba ku itariki ya 17 na 20 Ugushyingo. Undi mukinnyi ushobora kutazakina iyo mikino ibiri, ni Jude Bellingham wa Real Madrid uherutse kugira ikibazo cy'imvune mu rutugu.

Cole Palmer, yahamagawe mu ikipe y'igihugu y'u Bwongereza nyuma y'umunsi umwe akinnye umukino udasanzwe ubwo yabujije Man City ya Pep Guardiola gukura amanota atatu kuri Stanford Bridge.

Palmer yageze muri Chelsea, nyuma yo gutandukana na Manchester City mu mpeshyi y'uyu mwaka. 

Gareth Southgate wamaze kubona itike yo kwerekeza mu Budage, yahisemo guha amahirwe myugariro Roco Lewis w'imyaka 18 ukinira Manchester City. 

Myugariro wa Aston villa Ezri Konsa w'imyaka 26 y'amavuko, nawe yagiriwe amahirwe yo kuza mu ikipe y'igihugu. Muri 2017 Konsa yafashije Ubwongereza gutwara igikombe cy'isi cy'abatarengeje imyaka 20.

Cole Palmer, Rico Lewis na Ezri Konsa bahamagawe mu ikipe y'igihugu y'u Bwongereza igitaraganya 

Cole Palmer yahamagawe mu ikipe y'igihugu nyuma yo kubabaza Manchester City yahozemo, ubwo yayibuzaga gucyura Amanota atatu iyakuye kuri Stanford Bridge