Abafana b'ikipe ya Arsenal batangaje ko bahangayikishijwe n'abantu batazwi bari kugurisha ku kayabo amatike y'umukino wa nyuma wa shampiyona y'u Bwongereza, izahuriramo n'ikipe ya Wolves, ku itariki ya 28 Gicurasi.
Mu gihe abakunzi ba Arsenal bategereje ko iyi kipe yegukana shampiyona y'Abongereza izwi nka Premier League, yaherukaga gutwara mu myaka 19 ishize - hirya abantu batazwi bakomeje kugurisha ku kayabo amatike yo kwinjira muri uyu mukino wa nyuma, uzayihuza n'ikipe ya Wolverhampton Wanderers F.C ku itariki ya 28 Gicurasi.
Kugeza uyu munota ahasanzwe hagurishirizwa amatike ya Premier League hazwi nka StunHub, ibiciro byo kwinjira muri uyu mukino biri ku madorari 1,175 angana n'arenga Miliyoni y'amanyarwanda, mu gihe abo bantu batazwi bari kugurisha amatike bashyizeho igiciro gihanitse cy'amadorari 65,000 angana na Miliyoni 71 zirenga z'amanyarwanda.
Umwe mu banyamuryango ba Arsenal Supporters Trust, Akhil Vyas, yatangarije ikinyamakuru CNN ko "bihangayikishije kandi bibabaje" kubona abantu batazwi bagurisha amatike ya Arsenal, ndetse akomeza agira ati "Niba hari umuntu uri kugurisha amatike ye, uretse no kuba adafite impuhwe muri ibi bihe amikoro ahagaze nabi, ariko biranabujijwe ntabwo bakabaye babikora."
Nk'uko byanditse ku rubuga rwa Premier League, ubundi ubusanzwe amatike agurishwa n'ikipe iri muri shampiyona, ndetse bongeraho ko abagurisha amatike bitemewe, batakibikora mu buryo bwa kera bacuruzaga amatike ku miryango ya sitade, ahubwo basigaye banayacuruza kuri murandasi.
Vyas yakomeje asobanura ko hari umwe mu banyamuryango ba AST, waguze itike kuri aba bantu batemewe nyuma akaza gutega indege iva muri Leta ZUnze ubumwe za Amerika, aje kuburana ngo asubizwe amafaranga ye mbere y'umukino, kandi birumvikana ko hari amafaranga menshi yatakaje mu gutega indege na hoteli yarayemo.
Arsenal yatangaje ko yahagaritse imirongo igera ku 2,000 yacuruzaga bitemewe amatike y'umukino wayo na Wolves, gusa mu gihe aba bantu bakomeje kwiyongera, iyi kipe iraburira abafana bayo kwitondera ubu bujura, bagurira amatike ku mirongo yemewe y'ikipe yabo.
Ikipe ya Arsenal kugeza kuri ubu irarusha amanota umunani ikipe ya Manchester City bahanganye muri Premier League, gusa nubwo Man City igifite umukino ariko abafana ba Arsenal bafite icyizere ko ikipe yabo igiye kongera kwegukana iyi shampiyona, yaherukaga gutwara mu mwaka wa 2004.
Arsenal ihangayikishijwe n'abakomeje kugurisha ku kayabo umukino wa nyuma wa Premier League
Eng
RSS 
TANGA IGITECYEREZO