“Barcelona iri mu makipe meza ku Isi, vuba irazuka” – Pedri nyuma yo kongera amasezerano ahenze

Kuri uyu wa gatanu tariki ya 15 Ukwakira 2021, nibwo FC Barcelona yatangaje ko yongereye amasezerano Pedri azageza mu 2026 akinira iyi kipe y’i Catalonia, ndetse inashimangira ko ikipe yose izamushaka mbere y’uwo mwaka izatanga miliyali imwe y’amayero kugira ngo imwegukane.

Uyu musore w’imyaka 18 y’amavuko ukina mu kibuga hagati, ni umwe mu bahetse Barcelona ndetse banafatiye runini ikipe y’igihugu ya Espagne.

Umwaka umwe amaze muri iyi kipe y’ubukombe nyuma yo kuva muri Las Palmas, yemeje ubuyobozi, umutoza ndetse n’abafana ba Barcelona, bituma agirirwa icyizere cyo kuba umwe mu bakinnyi ikipe ishingiyeho.

Nyuma yo kongera amasezerano y’igihe kirekire kandi ahenze muri iyi kipe, Pedri yagize ati: “Barcelona iri mu makipe meza ku Isi, vuba irazuka. Nasinye amasezerano azageza mu 2026, gusa nizeye kuzakina imyaka myinshi muri iyi kipe”.

Ku myaka 18 y’amavuko, Pedri yaciye agahigo ko kuba umwe mu bakinnyi 30 bahataniye umupira wa zahabu uyu mwaka (ballon d’or), ndetse akaba anahataniye igihembo cy’umukinnyi ukiri muto w’umwaka ku Isi.

Mu mikino 56 Pedri amaze gukinira Barcelona, amaze gutsinda ibitego bine, akaba amaze gukinira ikipe y’igihugu ya Espagne imikino 10.

Pedri yasinye amasezerano azamugeza mu 2026 akinira Barcelona

Pedri yasinye amasezerano ahenze kuko ikipe yamwifuza izatanga miliyari imwe y'amayero

Pedri ari mu bafatiye runini FC Barcelona

Pedri ari mu bakinnyi bari kwifashishwa mu ikipe y'igihugu ya Espagne