Manchester United yatangiye shampiyona inyagira Leeds mu mukino Bruno Fernandez yigaragajemo

Uyu mukino wabereye ku kibuga Old Traford, Manchester United yagaragaje urwego rwiza rw’imikinire, umukino uri hamwe, wihuta kandi ufite intego, bitanga isura n’ishusho nziza ku mutoza Ole ndetse binatanga ubutumwa ku bafana b’iyi kipe ishobora kuzakora ikintu kiremereye muri uyu mwaka w’imikino.

Manchester United yakinaga umukino wayo wa mbere muri Premier League y’uyu mwaka, uretse kuba yari mu rugo imbere y’abafana bayo, yagaragaje urwego ruri hejuru mu mikinire.

Iyi kipe yo mu mujyi wa Manchester yayoboye iminota 90 y’umukino yarangiye inyagiye Leeds ibitego 5-1.

Manchester United yafunguye amazamu ku munota wa 30 ku gitego cyatsinzwe na Bruno Fernandez ku mupira mwiza yahawe na Paul Pogba.

Iminota 45 y’igice cya mbere yarangiye Manchester United iyoboye umukino ku ntsinzi y’igitego 1-0.

Igice cya kabiri kigitangira, Leeds yishyuye igitego cyatsinzwe na Luke Ayling ku munota wa 48, ku mupira mwiza yahawe na Stuart Dallas.

Iki gitego cya Leeds cyabaye nk’igikojeje agati mu ntozi, kuko nyuma y’iminota ine gusa, Mason Greenwood yatsinze igitego cya kabiri cya Manchester ku mupira yahawe na Pogba, Bruno Fernandes atsinda ibindi bitego bibiri byakurikiyeho ku munota wa 54 n’uwa 60, mu gihe Fred yatsinze igitego cy’agashinguracumu ku munota wa 68 ku mupira yahawe na Pogba.

Muri uyu mukino, Bruno Fernandez yatsinze ibitego bitatu, mu gihe Umufaransa Paul Pogba yatanze imipira Ine yavuyemo ibitego.

Ni intangiriro nziza kuri Manchester United yifuza kwegukana igikomb cya shampiyona y’uyu mwaka.

Manchester United yatangiranye intsinzi y'ibitego 5 muri Premier League

Bruno Fernandez yatsinze ibitego 3 muri uyu mukino

Pogba yatanze imipira Ine yavuyemo ibitego muri uyu mukino

Pogba na Fernandez bigaragaje cyane muri uyu mukino

Bruno yatahanye umupira