Bwa mbere mu myaka 21 Lionel Messi nta kazi afite, amakipe abiri niyo ahabwa amahirwe yo kumwegukana

Ni bwo bwa mbere bibaye mu myaka 21 ko Messi aba umukinnyi wigenga (Free agent) kuko igihe cyose wasangaga afite amasezerano muri iyi kipe y’i Catalonia, magingo aya yemerewe kuvugana n’ikipe iyo ariyo yose ku giti cye, ntabwo akiri umukinnyi wa Barcelona.

Amezi 12 arashize, uyu munyabigwi ashatse kuva muri Barcelona ariko biranga, kubera ibyari bikubiye mu masezerano yari afite muri iyi kipe. Ibiganiro ku masezerano mashya bivugwa ko biri kuba, bivuze ko Messi ashobora guhitamo kuguma i Nou Camp cyangwa akahava, ariko ubu, ashobora gutwarwa n'indi kipe ntacyo yishyuye Barcelona.

Umwaka w'imikino utaha Messi azakina he?

Guillem Balague umwanditsi w'imikino muri Espagne mu ntangiriro z'iki cyumweru yavuze ko Barcelona yazamuye urwego rwo kwihutirwa kw'ibiganiro, mu cyizere ko batangaza amasezerano ye mashya y'imyaka ibiri mbere y'uku kwezi kwa karindwi.

Yagize ati: "Kongera amasezerano ya Messi ni intego y'ibanze ya perezida mushya Joan Laporta kandi ubu ari kuvugana na se wa Messi ubwe ari nawe umuhagarariye, Jorge Messi.

"Kugira ngo babashe kumugumana, bizasaba iyi kipe kugabanya imari ikoresha ho asaga miliyoni 200 z'ama-euro kugira ngo ihuze n'ingingo ya 'Financial Fair Play' isabwa muri La Liga. Messi azi inyungu ziri mu yandi makipe, ariko kugeza ubu ntaravugana n'imwe muri zo, ategereje mbere na mbere kumva icyo Barcelona itanga".

Messi w'imyaka 34 byagiye bivugwa ko ashakwa cyane na Paris Saint-Germain na Manchester City, aho ashobora guhurira n'uwahoze amutoza Pep Guardiola, bivugwa kandi ko ashakwa no muri shampiyona ya Amerika.

Ubu ari muri Brazil aho ari gukina irushanwa rya Copa America na Argentine, ndetse yabaye umukinnyi wayihamagawemo kenshi ubwo kuwa kabiri yayikiniye ku nshuro ya 148 bakina na Bolivia atsinda ibitego bibiri muri 4 - 1 batsinze.

Messi ashobora kongera amasezerano muri FC Barcelona

Kuva muri FC Barcelona ntabwo byoroshye gusa byashoboka