Premier League: Liverpool yacuritse Manchester City,akazi kuri Arsenal kariyongera

Ni mu mukino wakinwe kuri iki Cyumweru Saa Kumi n'Ebyiri n'iminota 30 kuri Etihad Stadium.

Uyu mukino watangiye wihuta ku mpande zombi aho umupira wavaga ku izamu rimwe ujya ku rindi. 

Ku munota wa 13 Liverpool yaje gufungura amazamu ku mupira waruvuye muri koroneri usanga Dominic Szoboszlai awushyira kwa Mohamed Salah arekura ishoti riragenda rikubita ku maguru ya Nathan Ake, rijya mu nshundura.

Nyuma y'uko ikipe ya Manchester City itsinzwe igitego yakomeje kwiharira ibijyanye no guhererekanya umupira ndetse n'abakinnyi bayo bakagerageza gushaka kwinjira mu rubuga rw'amahina ariko ba myugariro ba Liverpool bakaba ibamba.

Ku munota wa 29 Omar Marmoush yari yishyuye ariko asifurwa ko yari yaraririye. Ku munota wa 37 Liverpool yaje kubona gitego cya kabiri gitsinzwe na Dominic Szoboszlai ku mupira yarahawe na Mohammed Salah.

Manchester City n'ubundi nyuma yo gutsindwa igitego cya kabiri yihariye umupira ndetse iranasatira cyane gusa biba iby'ubusa igice cya mbere kirangira Liverpool iyoboye n'bitego 2-0.

Mu gice cya kabiri Liverpool yaje ikomeza uburyo bwayo bwo kureka Manchester City igahererekanya umupira ubundi yo igacungira ku kuwirukankana maze ku munota wa 52 Mohamed Salah azamukana umupira yari ahawe na Trent Alexander Arnold awuhindura imbere y'izamu gusa habura uwukozaho ukuguru.

Ku munota wa 66 Manchester City yakoze impinduka mu kibuga havamo Kevin De Bruyne hajyamo James MacAtee.

Ku wa 73 na Liverpool yahise izikora havamo Andrew Robertson na Curtis Jones hajyamo Wataru Endo na Kostas Tsimikas. Manchester City yagiye ikomeza guhererekanya umupira imbere y'izamu abarimo Jeremy Doku bakagerageza gushota gusa birangira kubona igitego byanze.

Umukino warangiye Liverpool yegukanye amanota ku ntsinzi y'ibitego 2-1. Ni ubwa mbere iyi kipe itsinze Manchester City mu mukino ubanza n'uwo kwishyura mu mwaka umwe w'imikino kuva muri 2016.

Ikipe ya Liverpool yakomeje kuba ku mwanya wa mbere n'amanota 64 aho irusha amanota 11 Arsenal iyikurikiye naho Manchester City nayo ikomeza kuba ku wa Kane n'amanota 44.

Abakinnyi ba Liverpool bishimira intsinzi