Manchester City izesurana na Real Madrid! Uko tombora ya UEFA Champions League yagenze

Kuri uyu wa Gatanu tariki ya 31 Mutarama 2025 nibwo ku cyicaro cy'impuzamashyirahamwe y'umupira w'amaguru i Nyon mu gihugu cy'u Busuwisi habereye tombola y'uko amakipe azahura mu mikino ya kamparamaka ya UEFA Champions League ndetse n'uko azahura muri 1/8.

Mu mikino ya kamparamaka Manchester City yatomboye kuzakina na Real Madrid,Sporting itombora Borussia Dortmund,Atalanta itombora Club Brugge,Celtic itombora FC Bayern Munich naho Brest itombora Paris St Germain.

Ni mu gihe kandi AS Monaco yatomboye Benfica, Juventus itombora PSV Eindhoven naho AC Milan itombora kuzakina na Feyenoord.

Ikipe ya Man City yongeye gutombora Real Madrid nyuma yuko no mu mwaka ushize bari bahuriye muri 1/4 bikarangira Real Madrid iyikuyemo kuri penariti.

Muri 1/8 Liverpool izahura n’izava hagati ya PSG na Benfica cyangwa Brest na Monaco ari na ko bimeze kuri FC Barcelona 

Arsenal izahure n’izava hagati ya Feyenoord, Juventus, AC Milan cyangwa PSV Eindhoven ari nako bimeze kuri Inter Milan.

Atletico Madrid izahura nizava hagati ya Real Madrid na Manchester City cyangwa izava hagati FC Bayern Munich na Celtic ari nako bimeze kuri Bayer Leverkusen.

Lille izahura n’izava hagati ya Sporting Club de Portugal, na Club Brugge cyangwa Atalanta na Borussia Dortmund ari nako bimeze kuri Aston Villa.

Iyi tombora ibaye nyuma y'uko ku wa Gatatu aribwo hakinwaga imikino yo ku munsi wa 8 wa UEFA Champions League mbere y'uko hatangira imikino yo gukuranwamo.

Amakipe 8 ya mbere yahise abona itike ya 1/8, kuva kuya 9 kugeza kuya 24 anyuzwa mu mikino ya kamparamaka hagati yayo kugira ngo hazavemo 8 asanga andi muri 1/8 naho kuva kuya 25 kugeza kuya 36 zihita zisezererwa.

Imikino ya kamparamaka ya UEFA Champions League ibanza izakinwa tariki ya 11 na 12 naho iyo kwishyura ikinwe tariki ya 18 na 19 Gashyantare.

Iya 1/8 ibanza izakinwa tariki ya 4 na 5 naho iyo kwishyura ikinwe tariki ya 11 na 12 z'ukwezi  kwa Werurwe.

Iya 1/4 ibanza yo izakinwa tariki ya 8 na 9 naho iyo kwishyura ikinwe tariki ya 15 na 16 Mata,iya 1/2 ibanza ikinwe tariki ya 22 na 30 Mata mu gihe iyo kwishyura yo izakinwa tariki ya 6 na 7 Gicurasi.

Ni mu gihe umukino wa nyuma wo uzakinwa tariki ya 31 Gicurasi i Munich.

Manchester City yongeye gutombora Real Madrid