Igitego cy'umukinnyi ufite inkomoko mu Rwanda cyegukanye igihembo muri UEFA Champions League

Ku munsi w'ejo ku wa Gatatu, nibwo ikipe ya PSV Eindhoven yo mu Buholandi yatsindaga Liverpool ibitego 3-2 mu mikino yo ku munsi wa 8 wa UEFA Champions League.

Muri ibi bitego 3, icya mbere cyatsinzwe na Johan Bakayoko ku munota wa 35 ku mupira yari ahawe na Ricardo Pepi aragenda acenga Andy Robertson na Jarell Quansah awushyira mu izamu.

Iki gitego nicyo cyatsindiye igitego cyiza cy'uyu munsi wa 8 aho cyakurikiwe n'icya Adam Daghim wa Salzburg yatsinze Atletico Madrid,icya Ederson wa Atalanta yatsinze FC Barcelona na Guelor Kanga wa FK Crevena Zvezda yatsinze Young Boys.

Johan Bakayoko yavutse tariki ya 20 Mata muri 2003, avukira mu gace ka Overijse ko mu Bubiligi, akaba yarabyawe na nyina w'Umunyarwanda mu gihe se we akomoka muri Cote d'Ivoire.

Bivuze ko kuba akinira u Bubiligi ari ukubera ko ariho yavukiye, gusa mu bindi bihugu yari gukinira iyo abishaka harimo n'u Rwanda kuko nyina umubyara ari Umunyarwandakazi.

Johan Bakayoko ushobora gukina asatira anyura ku mpande, yatangiye gukina ruhago ahereye mu makipe y'abato yo mu Bubiligi arimo aya Oud-Heverlee Leuven, Club Brugge KV,K.V. Mechelen ndetse na R.S.C. Anderlecht mbere y'uko yerekeza mu ikipe ya PSV Eindhoven n'ubundi y'abato muri 2019.

Guhera icyo gihe yakinnye muri iyi kipe y'abato isanzwe ikina shampiyona y'icyiciro cya kabiri mu Buholandi, yitwara neza bituma muri 2022 azamurwa mu ikipe nkuru.

Igitego cye cya mbere mu ikipe nkuru ya PSV Eindhoven yagitsinze mu mukino ufungura shampiyona ya 2022-2023 ubwo batsindaga FC Emmen ibitego 4-1.

Mu mwaka ushize w'imikino, yatsinze ibitego 14 mu mukino yose yakinnye birimo n'igitego cye cya mbere yatsinze muri UEFA Champions League ubwo banganya na RC Lens 1-1.

Ikipe y'Igihugu y'u Bubiligi, Johan Bakayoko yatangiye kuyikinira ahereye mu y'abatarengeje imyaka 15 muri 2018.

Ikipe nkuru yo yayikiniye umukino wa mbere mu kwezi kwa 4 kwa 2023 ubwo batsindaga Sweden ibitego 3-0 aho yinjiye mu kibuga asimbuye ku munota wa 61. 

Mu kwezi kwa 7 muri uwo mwaka yahise atsinda igitego cye cya 1 ubwo batsindaga Estonia ibitego 3-0 mu gushaka itike y'igikombe cya Euro 2024.

Ikipe ya PSV Eindhoven ikinamo uyu mukinnyi izakina imikino ya kamparamaka ya UEFA Champions League nyuma y'uko yashoboye gusoreza ku mwanya wa 14 n'amanota 14.

Uko Johan Bakayoko yatsinze iki gitego cyegukanye igihembo cy'igitego cyiza cy'umunsi wa 8 wa UEFA Champions 

Johan Bakayoko afite inkomoko mu Rwanda