APR FC yatandukanye na Godwin Odibo nyuma y'amezi atandatu ayigezemo

Iyi kipe yabitangaje mu mugoroba wo kuri uyu wa Mbere ibinyujije ku mbuga nkoranyambaga zayo aho yavuze ko batandatukanye ku bwumvikane inamwifuruza intsinzi aho agiye agiye gukomereza.

Godwin Odibo atandukanye na APR FC nyuma yuko mu minsi yashize Chairman w'iyi kipe, Brig Gen Deo Rusanganwa yaherukaga gutangaza ko bari mu biganiro byo kureba uko batandukana.

Uyu mukinnyi ukina ku ruhande asatira yari amaze amezi atandatu aguzwe n’Ikipe y’Ingabo z’Igihugu, ariko ntabwo yigeze babona umwanya uhagije wo gukina ndetse urwego rwe rwakunze kwibazwaho.

Yari yarageze muri APR FC mu mpeshyi y'umwaka ushize avuye muri Sporting Lagos y'iwabo muri Nigeria.

Nubwo Godwin Odibo ariwe wenyine watandukanye n'iyi kipe ariko hari na mugenzi we bakomoka mu gihugu kimwe, Chidiebere Johnson Nwobodo nawe uri mu biganiro byo kuba yatandukana nayo ariko kugeza ubu ntabwo birakunda dore ko ari gushaka ko ahabwa amafaranga yose yari kuzahembwa mu masezerano yari asigaye.

Ibi bibaye nyuma yuko Abanya-Uganda Denis Omedi na Hakim Kiwanuka bakina basatira banyuze ku mpande baheruka gusinyira APR FC batangiye imyitozo kuri uyu Wa Mbere.

Iyi kipe yambara Umukara n'Umweru yasoje imikino ibanza ya shampiyona iri ku mwanya wa kabiri aho irushwa amanota atanu na Rayon Sports iri kumwanya wa mbere.